Category: Uncategorized

Watu waliofanikiwa ni wale tu wenye tabia za mafanikio. Brian Tracy aliposema hivyo, alieleza ukweli muhimu kuhusu kufanikiwa katika maisha binafsi na ya kitaaluma. Ili uweze kufanikiwa, kuna tabia na mbinu rahisi ambazo unapaswa kuzifuata. Kuzingatia mbinu hizi rahisi mara nyingi ni jambo lenye nguvu zaidi unaloweza kufanya ili uweze kufikia mafanikio yako. Katika makala hii nitakushirikisha Mbinu Tatu Rahisi za Mafanikio Zinazopuuzwa.

Mbinu Tatu Rahisi Za Mafanikio Zinazopuuzwa.

Mbinu Namba 1: Usingizi

Katika dunia yetu ya kisasa, watu wengi wanakosa usingizi kutokana na sababu mbalimbali. Sababu ya kwanza ni kwamba tunaishi maisha yenye shughuli nyingi na msongo wa mawazo. Tuko katika hali ya harakati za kila namna. Ni rahisi kukosa usingizi mzuri kwa kujidanganya kwamba hii inatupa muda zaidi wa kumaliza kazi nyingine. Au, msongo wa siku unaweza kufanya kuwa vigumu kwa baadhi ya watu kutuliza akili zao na hivyo kusababisha kulala kuwa ni changamoto.

Sababu nyingine inayosababisha kukosa usingizi katika nyakati hizi ni kukaa muda mrefu kwenye kompyuta, TV, na skrini za simu usiku wa manane. Jambo hili linaathiri uzalishaji wa melatonini na kufanya kuwa vigumu kulala. Ili kusaidia kuepukana na tatizo hili, jaribu kuepuka au kupunguza muda wa kutumia kompyuta, TV na simu angalau saa moja kabla ya kulala.

Tabia nyingine inayoweza kuongeza usingizi ni pamoja na kuandika diary au kufanya shughuli yoyote inayosaidia kutuliza akili na mwili kama vile kusoma kwa utulivu au kutafakari. Ukianza kupata usingizi wa kutosha kila usiku, mwili na akili yako itajiandaa kufurahia siku inayofuata na hivyo utashangazwa na matokeo yatakayokuja. Utaweza kufanya kazi kwa ufanisi zaidi.

Mbinu Namba 2: Mazoezi

Mbali na kuboresha usingizi wako, mazoezi ya kawaida ni lazima. Faida za kimwili za mazoezi zinafahamika vizuri, lakini faida za kiakili za mazoezi pia ni za kuzingatiwa. Tafiti nyingi zimeonyesha kuwa mazoezi ya kawaida yana athari kubwa kwa kuongeza kujiamini, matumaini, na ari. Unapofanya mazoezi, mwili wako hutoa endorphins, homoni inayokufanya ujisikie vizuri siku nzima na kutoa faida nyingi za kiakili, kihisia pamoja na za kimwili.

Hii itakuruhusu kufanya kazi zaidi siku nzima, na kukufanya uhisi umekamilika na kufanikiwa, kukionyesha kuwa unaweza kuweka malengo na kuyafanikisha. Kwa hiyo fanya mazoezi unayoyafurahia, na uyafanye mara kwa mara ili kufaidika na matokeo yake.

Mbinu Namba 3: Mawazo Chanya

Hatimaye, lazima ufikirie kwa njia chanya. Kuna nukuu maarufu ya Henry Ford inayosema, “Iwapo unafikiri unaweza au unafikiri huwezi, labda uko sahihi.” Hii ina maana kwamba, mtazamo wako juu ya maisha yako mara nyingi hugeuka kuwa unabii unaotimia kwako.

Unapojaza akili yako kwa mawazo chanya na matumaini, matokeo chanya kwa kawaida hufuatia. Kinyume chake, ikiwa unajaza akili yako na mawazo hasi na kukata tamaa, matokeo hasi utayapata. Kwa hiyo kuwa makini na mawazo yako, na ukiona mawazo hasi yanakuja, jaribu kuyabadilisha na mawazo chanya.

Mawazo chanya ni kama mafuta kwa akili yako, yanayokusukuma kufanikiwa na kukusaidia kushinda changamoto utakazokutana nazo badala ya kuvunjika moyo au kuziona kama vikwazo vya kudumu. Ili kuwa na mawazo yanayojielekeza kwenye mafanikio, ni muhimu kuanza kuwa na mtazamo chanya katika nyanja zote za maisha yako.

Kwa kuzingatia mbinu hizi tatu za msingi ambazo mara nyingi hupuuzwa, utaweza kuweka msingi wa kufanikisha malengo yako binafsi na ya kitaaluma. Kwa kupata usingizi mzuri, kujenga mwili wako, na kujaza akili yako na mawazo chanya, utaweza kuupatia mwili na akili yako kile kinachohitajika kufikia malengo yako na kushinda changamoto yoyote inayoweza kukujia.

Hatua za Kuchukua Leo

Sasa swali la leo ni hili, ni hatua zipi maalum utachukua leo kuboresha usingizi wako, mazoezi yako na mtazamo wako wa maisha? Acha maoni hapa chini nami nitahakikisha ninakujibu.

Ikiwa umefurahia makala hii na unadhani imekuwa na thamani katika kukuonyesha Mbinu Tatu za Mafanikio Zinazopuuzwa, usisite kushiriki na marafiki zako au mtu yeyote ambaye anaweza kufaidika na makala hii.Kama una swali au maoni yoyote usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala inayofuata.

Katika maisha, ili uweze kufanikiwa kuna kanuni ambazo unapaswa kuzifahamu na kuzifanyia kazi. Kanuni hizi ni za msingi sana kwa mtu yeyote anayetaka kufanikiwa. Hivyo, katika makala hii nitakushirikisha kanuni au sheria sita za mafanikio.

Sheria 6 Za Mafanikio

1.Sheria Ya Sababu Na Matokeo (The Law of Cause and Effect)

Sheria ya Sababu na Matokeo inasema kuwa, kwa kila tukio linalotokea katika maisha yako kuna sababu maalum. Inasema kuwa kila kitu huwa kinatokea kwa sababu, iwe unaijua sababu hiyo au la. Hakuna ajali.

Sheria ya Sababu na Matokeo inamaanisha kuwa, kuna sababu maalum za mafanikio na kuna sababu maalum za kushindwa. Kuna sababu maalum za afya na za ugonjwa. Kuna sababu maalum za furaha na za huzuni. Ikiwa kuna jambo katika maisha yako unalotaka kulifanikisha, unahitajika tu kufuatilia sababu zake na kuzirejea. Ikiwa kuna tukio katika maisha yako usilolifurahia, unahitajika kufuatilia sababu zake na kuziacha.

Sheria hii ni rahisi kiasi kwamba inawachanganya watu wengi. Wanaendelea kufanya, au kuto kufanya, mambo yanayosababisha wao kuwa na huzuni na kuchanganyikiwa, na kisha wanawalaumu wengine, au jamii, kwa matatizo yao.

Uendawazimu umefafanuliwa kama “kufanya mambo yale yale kwa njia ile ile na kutarajia kupata matokeo tofauti.” Hivyo, ili uweze kupata matokeo ya tofauti, unahitajika kufanya mambo yako kwa namna tofauti.

Kuna methali ya Kiskoti inayosema, “Ni bora kuwasha mshumaa mdogo kuliko kulaani giza.” Ni bora zaidi kukaa chini na kuchambua kwa makini sababu za shida zako kuliko kukasirika na kuzilalamikia.

Katika kitabu cha Wagalati 6:7 Biblia inasema, “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna.”
Sheria ya Sababu na Matokeo linaitwa Sheria ya Kupanda na Kuvuna. Inasema kuwa chochote unachopanda, ndicho utakachovuna. Pia inasema kuwa chochote unachovuna leo ni matokeo ya kile ulichopanda hapo awali. Ikiwa unataka kuvuna mavuno tofauti katika eneo lolote la maisha yako katika siku zijazo, unahitajika kupanda mbegu tofauti leo, na bila shaka, hii inahusu zaidi mbegu za akili.

Matumizi muhimu zaidi ya Sheria ya Sababu na Matokeo, au kupanda na kuvuna, ni hii: “Mawazo ni sababu na hali ni matokeo.”

Mawazo yako ndio sababu kuu ya hali ya maisha yako. Kila kitu katika uzoefu wako kimeanza na wazo la aina fulani, lako au la mtu mwingine.

Jinsi ulivyo au utakavyokuwa, ni matokeo ya jinsi unavyofikiria. Ikiwa utabadilisha ubora wa mawazo yako, utabadilisha ubora wa maisha yako. Mabadiliko katika uzoefu wako wa nje yatatokana na mabadiliko katika uzoefu wako wa ndani. Utavuna kile unachopanda.

Uzuri wa sheria hii isiyobadilika ni kwamba kwa kuikubali, unachukua udhibiti kamili wa mawazo yako, hisia zako na matokeo yako.

Kila kipengele cha mafanikio au kushindwa kwenye biashara kinaweza kuelezewa na sheria hii ya msingi. Ikiwa unapanda sababu sahihi, utavuna matokeo unayotarajia. Ikiwa unazalisha bidhaa au huduma zenye ubora ambazo wateja wanazihitaji na wako tayari kuzilipia, na kisha kuzitangaza kwa nguvu, utafanikiwa katika kuuza. Ikiwa haufanyi hivyo, hautafanikiwa.

Ikiwa unafanya kazi ya ubora wa hali ya juu na kufikia matokeo ambayo kampuni yako inayahitaji ili kukua na kustawi, utafanikiwa na utakuwa na furaha katika kazi yako. Ikiwa unawatendea wengine vizuri, watakutendea vizuri pia.

2.Sheria Ya Imani (The Law of Belief)

Sheria ya Imani inasema kuwa chochote unachokiamini, kwa hisia, kinakuwa ukweli wako. Kadri unavyoamini kwa nguvu kuwa kitu hiki ni cha kweli, ndivyo kinavyokuwa cha kweli zaidi kwako. Ikiwa unaamini kitu kwa dhati, huwezi kukifikiria kwa njia tofauti. Imani yako ko inakupa aina ya mtazamo wa maisha yako. inahariri au kukufanya kupuuza taarifa zinazoingia ambazo hazilingani na kile ulichoamua kuamini.

William James wa Harvard alisema, “Imani huunda ukweli halisi.” Katika Biblia, inasema, “Kwa kadiri ya imani yako [imani] itafanyika kwako.” Kwa maneno mengine, hauamini kile unachokiona bali unaona kile unachoamini.

Kwa mfano, ikiwa unaamini kabisa kuwa unastahili kuwa na mafanikio makubwa maishani, basi bila kujali kinachotokea, utaendelea kusonga mbele kuelekea malengo yako. Hakuna kitu kitakachokukwamisha.

Kwa upande mwingine, ikiwa unaamini kuwa mafanikio ni suala la bahati au ajali, basi utakatishwa tamaa kwa urahisi na kuvunjika moyo wakati mambo yanapokuwa hayaendi sawa kwako. Imani yako inakuandaa kwa ajili ya mafanikio au kushindwa.

Watu kwa ujumla wana mitizamo miwili ya kuangalia dunia. Mtizamo wa kwanza ni mtazamo chanya wa dunia. Ikiwa una mtazamo chanya wa dunia, kwa ujumla unaamini kuwa dunia ni mahali pazuri pa kuishi. Hivyo unakuwa na mwelekeo wa kuona mazuri kwa watu na hali, na kuamini kuwa kuna fursa nyingi karibu nawe na unaweza kuzitumia. Unaamini kuwa ingawa huenda wewe si mkamilifu, wewe ni mtu mzuri kwa ujumla. Kimsingi, wewe ni mtu mwenye matumaini.

Njia ya pili ya kuangalia dunia ni kwa mtazamo hasi wa dunia. Ikiwa una mtazamo hasi wa dunia unakuwa na mwelekeo wa kukata tamaa juu yako mwenyewe na maisha yako. Kwa ujumla unakuwa unaamini kuwa “Hauwezi kupambana na hali ya maisha yako,” na kwamba “Wenye nacho huendelea kuwa na nacho na wasio nacho huendelea kuwa maskini,” na pia unaamini kuwa, haijalishi anavyofanya kazi kwa bidii, hauwezi kufanikiwa kwa sababu mambo yamepangwa kinyume na wewe.

Watu wenye mtazamo hasi huona ukosefu wa haki, ukandamizaji na bahati mbaya kila mahali. Wakati mambo yanapokwenda vibaya kwao, kama inavyotokea mara nyingi, wanalaumu bahati mbaya au watu wabaya. Wanajiona kama wahanga. Kwa sababu ya mtazamo huu, hawajipendi wala kujiheshimu.

Hivyo, vizuizi vikubwa vya kiakili ambavyo utahitajika kuvishinda ni vile vilivyomo katika imani yako vinavyokuzuia kuchukua hatua kuhusu maisha yako. Vizuizi hivi vinakurudisha nyuma kwa kukuzuia hata kujaribu. Mara nyingi vinakufanya kuona vitu ambavyo si vya kweli kabisa.

3.Sheria Ya Matarajio (The Law of Expectations)

Sheria ya Matarajio inasema kuwa, chochote unachotarajia kwa kujiamini kinakuwa ni unabii wako mwenyewe. Kwa maneno mengine, kile unachopata sio lazima kile unachotaka maishani, bali ni kile unachotarajia. Matarajio yako yana athari kubwa na isiyoonekana ambayo inasababisha kufanikiwa au kushindwa.

Kwa njia fulani, kila mara unakuwa kama mtabiri wa maisha yako. Watu waliofanikiwa wana mtazamo wa matarajio ya kujiamini na chanya. Wanatarajia kuwa na mafanikio, wanatarajia kupendwa, wanatarajia kuwa na furaha, na mara chache wanavunjika moyo.

Watu wasiofanikiwa wana mtazamo wa matarajio hasi, wa ukosoaji na wa kukata tamaa ambao kwa namna fulani unafanya hali kutokea kama walivyotarajia.

Katika kitabu cha “Pygmalion in the Classroom,” Dkt. Robert Rosenthal wa Chuo Kikuu cha Harvard anaelezea jinsi matarajio ya walimu yanavyokuwa na athari kubwa kwenye utendaji wa wanafunzi wao. Aligundua kuwa ikiwa wanafunzi wanahisi kuwa wanatarajiwa kufanya vizuri, huwa wanajitahidi kufanya vizuri zaidi kuliko ambavyo wangekuwa bila matarajio hayo.
Kwa hiyo, ni muhimu kuhakikisha kwamba matarajio yako yanakubaliana na kile unachotaka kuona kinatokea maishani mwako. Kuwa na matarajio mazuri kwako mwenyewe, na matarajio hayo yatakuwa na nguvu ya kubadilisha utu wako na maisha yako kwa ujumla.

4.Sheria ya Mvuto (The Law of Attraction)

Sheria ya Mvuto inasema kwamba wewe ni sumaku hai. Unavuta bila kukosea katika maisha yako watu na hali zinazolingana na mawazo yako yanayokutawala. Ndiyo maana waswahili wanasema kuwa, ” ndege wa aina moja huruka pamoja.” Kila kitu katika maisha yako umekivuta mwenyewe kutokana na mawazo yako.

Marafiki zako, familia yako, mahusiano yako, kazi yako, matatizo yako, na fursa zako vyote vimevutwa kwako kutokana na njia yako ya kawaida ya kufikiri katika kila eneo.

Unapoangalia kila kipengele cha maisha yako, chanya au hasi, utaona kwamba ulimwengu wako wote umeutengeneza mwenyewe. Na kadiri unavyoweka hisia zaidi kwenye wazo, ndivyo kasi ya mtetemo itakuwa kubwa zaidi na ndivyo utakavyovuta watu na hali zinazolingana na wazo hilo katika maisha yako kwa haraka zaidi.

Utaona kuwa, sheria hii huwa inafanya kazi kila wakati katika maisha yako. Kwa mfano, Unamfikiria rafiki yako na mara hiyo hiyo anakupigia simu. Unaamua kufanya jambo fulani na mara tu baada ya hapo unaanza kupata mawazo na msaada kuhusiana na jinsi utakavyofanikisha jambo hilo. Unakuwa kama sumaku inayovuta vipande vya chuma.

Watu wengi wanajizuia wenyewe kufanikiwa kwa sababu hawajui jinsi ya kutoka walipo hadi wanapotaka kwenda. Lakini kwa sababu ya Sheria ya Mvuto, si lazima uwe na majibu yote kabla hujaanza. Mradi tu unaelewa vizuri unachotaka na aina ya watu unaotaka kuwa nao, utawavuta katika maisha yako.

Watu wenye furaha wanaonekana kuvutia watu wengine wenye furaha katika maisha. Mtu aliye na ufahamu wa ustawi anaonekana kuvutia mawazo na fursa za kutengeneza pesa. Wauzaji wanaoaminika na wenye msisimko huvutia wateja wakubwa na bora zaidi. Wafanyabiashara chanya huvutia rasilimali, wateja, wasambazaji na mabenki wanayohitaji kujenga biashara zenye mafanikio. Sheria ya Mvuto inafanya kazi kila mahali na wakati wote.

5.Sheria ya Uwiano (The Law of Correspondence).

Sheria ya Uwiano ni mojawapo ya sheria muhimu zaidi, na kwa namna nyingi ni sheria ya muhtasari inayofafanua sheria nyingine nyingi. Inasema kuwa, “Jinsi ulivyo ndani, ndivyo ulivyo nje.” Sheria hii inamaanisha kwamba, ulimwengu wako wa nje ni taswira ya ulimwengu wako wa ndani. Sheria hii inafafanua kuwa, unaweza kujua kinachoendelea ndani yako kwa kuangalia kinachoendelea kukuzunguka wewe.

Katika Biblia, kanuni hii inaelezwa kwa maneno haya, “Kwa matunda yao, mtawatambua.” Kila kitu katika maisha yako ni kutoka ndani kwenda nje. Ulimwengu wako wa nje ni udhihirisho unaolingana na ulimwengu wako wa ndani wa mawazo na hisia.

Ulimwengu wako wa nje wa mahusiano unaendana na mtu uliye ndani, utu wako wa kweli wa ndani. Ulimwengu wako wa nje wa afya unaendana na mitazamo yako ya ndani ya akili. Ulimwengu wako wa nje wa mapato na mafanikio ya kifedha unaendana na ulimwengu wako wa ndani wa mawazo na maandalizi. Jinsi ambavyo watu wanakuitikia na kuingiliana na wewe inaakisi mitazamo na tabia yako kwao.

Mwanafalsafa Mjerumani Goethe alisema, “Lazima uwe kitu ili uweze kufanya kitu.” Lazima ubadilike wewe mwenyewe. Lazima uwe mtu tofauti ndani kabla ya kuona matokeo tofauti nje.

6.Sheria ya Usawa wa Akili (The Law of Mental Equivalency)

Sheria ya Usawa wa Akili inajulikana pia kama Sheria ya Akili na inaweza kufikiriwa kama ufafanuzi wa sheria zilizotangulia. Kimsingi, inasema kwamba, Mawazo yako, unayoyafikiria kwa undani na kuyarudia yakiwa na hisia, baadaye huwa yanakuwa ukweli wako. Karibu kila kitu ulicho nacho katika maisha yako kimeundwa na mawazo yako mwenyewe, kwa ubora au ubaya.

Kwa maneno mengine, mawazo ni vitu. Yanachukua maisha yako mwenyewe. Kwanza unakuwa nayo, kisha yanakumiliki. Unatenda kwa namna inayolingana na kile unachofikiria mara nyingi zaidi. Hatimaye, unakuwa kile unachofikiria. Na ukibadilisha mawazo yako, unabadilisha maisha yako.

Kila kitu kinachotokea katika maisha yako kwanza huanza kutokea katika namna ya wazo. Hii ndio sababu tafakari ni sifa muhimu ya wanaume na wanawake waliofanikiwa.

Nguvu ya Kufikiri Chanya

Unapoanza kufikiri kwa njia chanya na kwa kujiamini kuhusu vipengele vikuu vya maisha yako, unachukua udhibiti wa kile kinachotokea kwako. Unaleta maisha yako katika maelewano na sababu na athari. Unapanda sababu chanya na kuvuna athari chanya. Unaanza kuamini zaidi katika nafsi yako na uwezo wako. Unatarajia matokeo chanya zaidi. Unavuta watu na hali chanya, na hivi karibuni maisha yako ya nje ya matokeo yataanza kulingana na ulimwengu wako wa ndani wa mawazo ya kujenga.

Mabadiliko haya yote yanaanza na mawazo yako. Badilisha mawazo yako na maisha yako yatabadilika.

Nimatumaini yangu kuwa umenufaika na makala hii ya sheria 6 za mafanikio. Kama una maoni au swali lolote usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.

Brian Tracy, mtaalamu wa masuala ya maendeleo binafsi (self development) aliwahi kusema kuwa, Unaweza kutimiza takriban lengo lolote ulilojiwekea, mradi tu lengo lako liwe wazi na uendelee kwa muda wa kutosha kulifanyia kazi. Kuzingatia mpango wako binafsi wa maendeleo huongeza sifa ulizo nazo ndani yako na hufanya ndoto na matarajio yako kugeuka kuwa ukweli. Uwezo wako hauna kikomo na kuwekeza katika maendeleo yako binafsi ni njia ya kutumia talanta zako nyingi. Katika makala hii nitakushirikisha jinsi ya kuweka mpango wa maendeleo ili uweze kufanikiwa katika maisha yako.

Umuhimu wa Kuwa na Malengo.

Kuweka malengo ya kile unachotaka kufikia na wapi ungependa kwenda kwa muda mfupi au mrefu kunaweza kuboresha maendeleo yako binafsi. Baada ya kusoma karibu kila kitu kilichoandikwa au kusemwa juu ya maendeleo ya binafsi na mafanikio, Brian Tracy alifikia hitimisho kwamba mzizi wa yote mawili ni kiwango chako cha kujiamini. Kujiamini ni jambo muhimu katika kila kitu unachotaka kukikamilisha katika maisha yako.

Watu wengi hawafaulu katika taaluma zao kwa sababu hawatambui maeneo ya maendeleo yao binafsi ambayo yanaweza kuwasaidia kufikia ustadi wa hali ya juu katika maisha yao. Hakuna mbadala wa kufanya kazi kwa bidii. Ikiwa utaweka lengo, weka mpangokazi na uufanyie kazi kila siku, utaona maendeleo ndani ya kazi yako.

Mipaka ipo Akilini Mwako.

Hakuna mipaka ya mafanikio isipokuwa mipaka unajiwekea wewe mwenyewe kwenye mawazo yako. Usichoke kujifunza maisha yako yote. Hata kama una mafanikio ya juu kwenye malengo yako, daima kuna kitu cha kujifunza.

Utakuwa mtu mwenye mafanikio yasiyopimika na utaona maisha yako yote yajayo yanafunguka mbele yako ikiwa unaishi maisha yenye malengo na yenye mwelekeo wa kukua. Kuwa na mpango hukusaidia kupata hali bora ya udhibiti wa maisha yako na kutakufanya uwe tayari kwa lolote litakalokuja.

Maana ya mpango wa maendeleo binafsi.

Unaweza kuwa unafikiria, mpango wa maendeleo binafsi ni nini?
Mpango wa maendeleo binafsi ni mwongozo wa maisha yako na mafanikio yako ya baadaye.

Sababu ya kuwa na mpango wa maendeleo binafsi ni kwamba, kufanya mpango kutakusaidia kufanya maamuzi bora na kujikumbusha mahali unapotaka kwenda. Maandalizi mazuri huongeza uwezekano wa kufaulu na hupunguza hatari ya mambo kwenda kombo. Unapoandika mpango wako wa maendeleo ya binafsi, fikiria kuhusu malengo unayotaka kufikia, njia ambazo unahitajika kuziboresha na kuziendeleza, na hivyo kuwa na mpango ambao utakufanya uwe tayari kukabiliana na kazi muhimu zaidi kwa siku zinazokuja.

Hatua tano Muhimu za Maendeleo Binafsi.

Katika Ukuaji binafsi, kabla ya kujiwekea mpango, unahitajika kutafakari kisha ufuate hatua hizi sita za msingi.

Hatua ya kwanza ni kuandika orodha ya malengo 10 muhimu zaidi ambayo ungependa kuyafikia.

Hatua ya pili ni kuandika ni yapi kati ya hayo malengo 10 ni muhimu zaidi kwako na kwa nini.

Hatua ya tatu ni kuandika ratiba maalum ya kufikia lengo lako.

Hatua ya nne, andika uwezo na udhaifu wako.

Kisha, zingatia kuandika uwezo wako katika maeneo matatu na mapungufu yako matatu na kisha uandike jinsi uwezo wako unavyoweza kukusaidia kufikia lengo hili na jinsi unavyopanga kushinda udhaifu huo. Hii itakusaidia kuweka mpango wa maendeleo binafsi katika vitendo na kutokukata tamaa unapopata changamoto.

Hii inaweza kuwa mambo unayohitajika kuongeza kwenye utaratibu wako wa kila siku pamoja na mambo unayohitaji kuondokana nayo.

Kwa kufanya hivi kutakusaidia kufikia kila lengo haraka.

Na hatimaye, hatua ya tano ni kutathmini maendeleo yako. Andika malengo yale ambayo yamekuwa yakifanya kazi vizuri, yale ambayo umekamilisha, yale ambayo bado unahitajika kuyaboresha, na ni ujuzi gani au maarifa gani umeyapata njiani.

Sasa, ningependa kusikia kutoka kwako. Swali letu la leo; ni nini kinakuzuia kufikia malengo yako? Je, ni ukosefu wa mpango? Acha maoni hapa chini nami nitahakikisha kuwa ninakutafuta ili tushauriane.

Ikiwa umefurahia makala hii na unahisi ilikuwa ni ya thamani sana kwako, usisite kuwashirikisha marafiki zako.

Kama una swali lolote usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.

Watu wengi wameshindwa kufanikiwa katika maisha na katika malengo yao sio kwa sababu hawana uwezo au kipaji. Bali ni kwa sababu hawana nidhamu katika maisha yao. Katika makala ya leo nitakushirikisha jinsi ya kujenga nidhamu katika maisha yako ili uweze kufanikiwa.
Maana ya nidhamu.
Nidhamu ni ile hali ya kufanya kitu ambacho ni cha muhimu kwako na kwa muda muafaka bila kujali kama unajisikia au la.
Watu wengi wamezaliwa wakiwa na uwezo mkubwa lakini wameshindwa kufanikiwa katika maisha yao na kuishi wakiwa watu wa kawaida mpaka wanaondoka duniani kwa sababu walishindwa kujenga nidhamu katika maisha yao. Ili uweze kufanikiwa ni lazima ujenge nidhamu katika maisha yako.
Jinsi ya kujenga nidhamu katika maisha ili uweze kufanikiwa.
1. Nidhamu ya muda.
Muda ni rasilimali ya muhimu na ya pekee sana ambayo kila mtu amepewa kwa usawa. Hakuna mtu aliyependelewa akapewa muda mwingi kuliko watu wengine. Hivyo ili uweze kufanikiwa ni lazima ujifunze kuwa na nidhamu ya hali ya juu ya matumizi ya muda. Ili uweze kufanikiwa, hakikisha unaorodhesha Mambo ambayo utayafanya kwenye siku husika siku moja kabla. Pia hakikisha unapoweka orodha hiyo, panga mambo hayo kwa vipaumbele ukianzia na mambo ya muhimu sana kufanyika. Unapokuwa umeamka, anza kufanya mambo muhimu uliyoyaandika. Baada ya kuwa umemaliza kufanya mambo ya muhimu sana yanayochangia mafanikio yako, ndio umalizie mambo ambayo siyo ya muhimu sana.
2. Nidhamu ya fedha
Eneo la pili unalopaswa kulijengea nidhamu ya hali ya juu ni eneo la fedha. Ili uweze kufanikiwa, hakikisha kuwa, kila pesa inayopita kwenye mikono yako inakuwa na udhibiti wa hali ya juu. Katika eneo hili la fedha, fanya mambo yafuatayo ili uweze kuwa na mafanikio:
i. Andaa bajeti yako.
Bajeti ni mwongozo wa mapato yako na jinsi unavyoyatumia. Ni lazima ufahamu kuwa, unapokuwa na pesa na ukawa hauna mwongozo wa jinsi ya kuitumia, pesa yako itatumika kwa mambo yasiyokuwa ya msingi. Watu wengi wameshindwa kufanikiwa Katika suala la kifedha, siyo kwamba hawapati pesa, bali ni kwa sababu hawana bajeti.
ii. Hakikisha kuwa unaweka akiba.
Hakikisha kuwa kila pesa unayopata, unatenga pesa ambayo utaweka akiba. Unaweza kuweka akiba angalau asilimia kumi ya kila kipato chako. Lazima uanze kwa kutenga akiba kwanza kabla ya matumizi mengine.
iii. Epuka mikopo isiyojenga
Mikopo inakuwa na manufaa pale tu itakapotumika kufanya jambo lenye manufaa kwenye kwenye maisha yako. Hakikisha kuwa kama itakulazimu kuchukua mkopo, basi ni lazima uuelekeze kwenye jambo la uzalishaji au kununua kitu ambacho kinaongezeka thamani. Pia unaweza kuchukua mkopo kama tu kuna jambo la dharura kama vile kuokoa maisha.
iv. Fanya uwekezaji wa muda mrefu.
Pesa yako ya akiba unaweza kuiwekeza ili iweze kuongezeka kwa kununua vitu vinavyoongezeka thamani. Hapa unaweza kuiwekeza kwa kununua hisa, hatifungani, kununua shamba au kiwanja. Jambo la msingi hapa ni kuifanya pesa yako iongezeke thamani. Ukiweza kuwekeza pesa yako kwa muda mrefu, utapata matokeo mazuri sana kwani baada ya muda unaweza kuendesha maisha yako kwa ile faida tu inayotokana na uwekezaji wako.
Ni matumaini yangu kuwa umepata maarifa ya kukusaidia kuweza kujenga nidhamu ili uweze kufanikiwa kupitia makala hii.
Swali la leo.
Ni maeneo gani unahitaji kujenga nidhamu ili uweze kufanikiwa kwenye maisha yako?
Ninatamani sana unishirikishe kwa kuandika hapa chini Kwenye box la maoni.

Katika kufanya utafiti na kusoma kwangu vitabu nilitamani kujifunza jinsi watu waliofanikiwa na matajiri duniani wanavyoishi. Lengo la kusoma kwangu vitabu lilikuwa ni kujua siri ya maisha yao na kufahamu vitu vya tofauti wanavyofanya na hivyo kuweza kujitofautisha na watu wa kawaida. Miongoni mwa watu ambao niliowahi kusoma vitabu vyao ni aliyekuwa Rais wa Marekani, Donard Trump pamoja na matajiri wengine wengi. Katika kusoma kwangu, niligundua kuna mambo matatu muhimu ambayo watu waliofanikiwa huwa wanafanya. Katika Makala ya leo nitakushirikisha mambo matatu muhimu wanayofanya watu waliofanikiwa Duniani ambayo hata wewe unaweza kuyafanya ili uweze kufanikiwa.
Mambo 3 muhimu wanayofanya watu waliofanikiwa duniani.
1. Ni wasomaji wazuri sana wa vitabu.
Jambo la kwanza kabisa ambalo watu waliofanikiwa hufanya ni wasomaji wazuri sana wa vitabu. Ukifuatilia matajiri wote wakubwa wa dunia kama vile Donard Trump, hutumia muda wao mwingi katika kuongeza maarifa kupitia usomaji wa vitabu. Lengo kubwa la usomaji wao wa vitabu ni kuongeza ujuzi na maarifa kuhusiana na biashara pamoja na shughuli zao zingine wanazozifanya. Hivyo, hata wewe kama unataka kufanikiwa kwenye malengo yako, wekeza muda wako katika kujenga ujuzi wako kwenye shughuli unayofanya ili uweze kupata matokeo makubwa. Akili ya mwanadamu ni kama panga la kukatia ambalo linatakiwa kunolewa ili liweze kukata kwa urahisi. Tunanoa akili zetu kwa kujifunza maarifa mapya kila siku kupitia usomaji wa vitabu. Hivyo, kama unataka kufanikiwa, panga ratiba ya kusoma vitabu kila siku.
2. Hawaishi maisha ya kujionyesha ili kuridhisha watu.
Changamoto kubwa iliyopo kwa watu wengi ni kuishi maisha yasiyokuwa na uhalisia. Unakuta mtu anatamani kuishi maisha ya juu kuliko kipato chake. Anatamani awe na gari, awe na nguo za gharama kubwa, apange kwenye nyumba ya bei ya juu wakati kipato chake hakiwezi kuhimili gharama hizo. Wanaishi maisha yao ili kuwaridhisha watu. Matokeo yake ni kuingia kwenye madeni na kupata stress za maisha. Watu waliofankiwa hawafanyi hivyo. Wanaishi maisha yao kulingana na kipato chao. Hawaishi kuwaridhisha watu. Hivyo, ili uweze kufanikiwa, unapaswa kuwa na bajeti na matumizi yako yasizidi kipato chako. Ishi maisha yako na siyo kuishi ukishindana na watu.
3. Matumizi yao makubwa ya pesa yanaenda kwenye uwekezaji.
Watu waliofanikiwa wanapopata kipato chao hawaelekezi kipato chao chote kwenye matumizi ya kawaida. Asilimia kubwa ya kipato chao huwa wanakielekeza kwenye uwekezaji. Kila wanapopata kipato, asilimia Fulani wanawekeza kwenye biashara, kwenye kununua hisa, kwenye kununua hatifungani na kadhalika. Kabla ya kuanza kufanya matumizi ya kawaida, jambo la kwanza kabisa huwa wanatenga pesa kwa ajili ya uwekezaji. Hebu jiulize swali hili, kila unapopata pesa, ni asilimia ngapi unawekeza? Kama hauwekezi, na pesa yote unatumia kwa matumizi ya kawaida, basi hautaweza kufanikiwa. Haijalishi unapata kiasi gani cha pesa. Hata kama ni kidogo kiasi gani, kumbuka kutenga kwanza kiasi cha pesa ambacho utawekeza.
Kwa leo niishie hapo. Nimatumaini yangu kuwa umepata maarifa ya kutosha kuhusiana na mambo wanayofanya watu waliofanikiwa ambayo hata wewe pia ukifanya utapata mafanikio makubwa. Kama una maoni au swali lolote usisite kuweka maoni yako hapa chini. Pia kwa ushauri wowote, usisite kuwasiliana name kwa simu namba 0752 081669. Asante na karibu tena kwenye Makala zinazofuata.