Category: JINSI YA KUFANIKIWA

Hivi unakumbuka ni mara ngapi uliwahi kupata fursa fulani ambayo ungeichangamkia ingeweza kubadilisha maisha yako lakini ulishindwa kuchukua hatua kwa sababu ya hofu? Au ni mara ngapi umewahi kupata wazo la kufanya kazi au biashara fulani lakini hukuanza kwa sababu ya hofu? Katika maisha, hofu ni adui mkubwa sana ambaye huwa anasababisha watu wengi wasifanikiwe. Katika makala hii nitakushirikisha jinsi ya kushinda hofu Ili kupata mafanikio makubwa kwenye maisha yako.

Hofu ni nini?
Hofu ni hisia ya wasiwasi au tahadhari inayojitokeza kutokana na tishio au hatari. Hofu mara nyingi inajitokeza katika mazingira ambayo tunakuwa hatuna uhakika wa nini kitatokea au wakati tunakabiliwa na kitu ambacho tunakiona kama ni hatari. Hii inaweza kuwa ni kitu halisi au kitu cha kufikirika na inaweza kuathiri hisia zetu, mawazo, na mwitikio wetu kwa hali hiyo. Hivyo, hofu huwa inachangia kwa kiwango kikubwa kuzuia mafanikio.

Mifano ya hofu.
Ifuatayo ni mifano ya maeneo ambayo unaweza kuwa na hofu na hivyo kuzuia mafanikio yako.

1.Hofu ya kushindwa: Kama unataka kuanzisha biashara yako anaweza kuwa na hofu ya kushindwa. Unaweza kuwa na wasiwasi kwamba biashara yako haitafanikiwa au kwamba hautapata faida ya kutosha. Hofu hii inaweza kukuzuia kuchukua hatua muhimu katika kuanzisha biashara yako au kujaribu mambo mapya.

2.Hofu ya kuongea mbele ya watu hadharani: Kama unataka kuongea mbele ya umati mkubwa wa watu unaweza kuwa na hofu ya kujitokeza hadharani. Unaweza kuwa na wasiwasi kuhusu jinsi utakavyozungumzu au jinsi atakavyopokelewa na watu. Hofu hii inaweza kukuzuia kutoa ujuzi au maarifa yako wa watu wengine na hivyo kuzuia ukuaji wako binafsi na taaluma yako.

3.Hofu ya kukataliwa kijamii: Kama unataka kuanzisha uhusiano mpya au kuomba msaada, unaweza kuwa na hofu ya kukataliwa. Unaweza kuwa na wasiwasi kwamba utakataliwa. Hivyo, hofu hiyo inaweza kukuzuia kuchukua hatua kutafuta msaada au kuwa karibu na watu wengine ambao wangeweza kukusaidia kupiga hatua.

4.Hofu ya mabadiliko: Kama unahitajika kufanya mabadiliko makubwa katika maisha yako, unaweza kuwa na hofu ya mabadiliko. Unaweza kuwa na wasiwasi juu ya kuingia katika kazi au biashara mpya. Hofu hii inaweza kukuzuia kuchukua hatua ambazo zingeweza kubadilisha maisha yako.

Jinsi Ya Kushinda Hofu Ili Kupata Mafanikio Makubwa Kwenye Maisha Yako.

1.Bainisha na utambue hofu uliyonayo:

Hatua ya kwanza kabisa katika kushinda hofu ni kutambua na kukubali kuwa una Hofu katika eneo fulani inayoathiri maisha yako. Tambua hofu hiyo kwa kuitaja. Kwa mfano, ikiwa unahofia kushindwa, kutambua hisia hiyo na kukubaliana nayo ni hatua ya kwanza ya kushinda hofu hiyo.

2.Fanya utafiti na jiandae:

Ujuzi na uelewa unaweza kukusaidia kushinda hofu. Jifunze zaidi juu ya hofu yako kupitia vitabu, makala, na vyanzo vingine ili upate maarifa au taarifa sahihi. Kujiandaa na kujifunza ni njia muhimu ya kuweka udhibiti na kujiimarisha dhidi ya hofu hizo.

3.Chambua hofu yako:

Tathmini hofu yako kwa undani. Jiulize ni kwa nini hofu hiyo ipo na ni nini kinachosababisha. Changanya hisia zako na fikra zako na uangalia kama unaweza kuona sababu halisi za hofu yako. Kuchambua hofu yako kutakusaidia kugundua ukweli wa hofu hiyo.

4.Tumia mbinu za kufanya mazoezi na kupumzika kupunguza wasiwasi:

Jifunze njia za kufanya mazoezi na kupumzika ambazo zitakusaidia kupunguza wasiwasi. Mbinu kama vile mazoezi ya kupumua na mazoezi ya mwili yanaweza kupunguza kiwango cha wasiwasi na kukuwezesha kushinda hofu yako.

5.Jitamkie maneno mazuri:

Jifunze kutumia maneno mazuri yenye hamasa. Badala ya kuwa na mawazo hasi au ya kujidharau, jipe moyo. Tumia maneno kama “Ninaweza kufanya hili,” “Nina ujasiri na nguvu za kushinda hofu yangu,” nk.

6.Kubaliana na hatari:

Kukubali kwamba hakuna mafanikio bila hatari (risk) ni muhimu katika kushinda hofu. Tambua kuwa fursa za kufanikiwa huwa zinakuja pamoja na hatari (risk) zake. Hii itakusaidia kutokuwa na hofu ya hatari ambazo zinaweza kujitokeza.

7.Tafuta msaada na usaidizi:

Usihangaike peke yako katika safari ya kushinda hofu. Tafuta msaada kutoka kwa marafiki, familia, au hata kocha wa maisha (Life Coach). Msaada huu unaweza kukupa motisha, uongozi na mtazamo mpya katika kukabiliana na hofu yako.

8.Chukua hatua ndogondogo:

Panga hatua ndogondogo kadri unavyoweza kukabiliana na hofu yako. Weka malengo madogomadogo ambayo unaweza kuyafikia hatua kwa hatua. Kuchukua hatua ndogo ndogo na kuzitimiza kunakuwezesha kujenga ujasiri na kurudisha udhibiti wako juu ya hofu yako.

9.Tafuta mifano ya watu walioanikiwa:

Jiunge na jamii ambayo ina mifano ya watu ambao wamefanikiwa na ambao walipitia hofu kama zako. Pata habari na shuhuda za mafanikio za watu hao. Shuhuda hizo zitakupatia hamasa na kuamsha imani yako katika uwezo wako wa kushinda hofu.

10.Jielekeze kwenye matokeo chanya:

Badala ya kuzingatia matokeo mabaya au mawazo hasi, zingatia matokeo chanya ambayo ungependa kufikia. Kuweka fikira na nguvu zako kwenye matokeo chanya kunaweza kukusaidia kupunguza hofu yako na kuongeza ujasiri wako.

11.Fanya kile kinachokusisimua:

Kuweka mazingira na kufanya vitu ambavyo vinakuhamasisha na kukufanya ufurahie kunaweza kukusaidia kushinda hofu. Kujihusisha na shughuli ambazo unavutiwa nazo na kufanya vitu ambavyo vinakuza hisia za furaha na kuridhika kunakuwezesha kusahau hofu yako na kuongeza ujasiri.

12.Kubali kushindwa mara kwa mara:

Kushindwa ni sehemu ya mchakato wa kufikia mafanikio. Kubaliana na ukweli kwamba utakabiliwa na changamoto na kushindwa mara kwa mara. Hakikisha unakubali kushindwa ukiwa na mtizamo chanya na unajifunza kutoka kwenye kila kushindwa kwako. Hii itakuimarisha na kukuwezesha kufanikiwa zaidi.

13.Kuwa na uvumilivu:

Kushinda hofu na kufikia mafanikio ni safari ya muda mrefu, na inaweza kuhitaji uvumilivu. Jua kwamba hatua ndogo za kubadilika na kukua zinachukua muda na juhudi. Kuwa mvumilivu na jikumbushe mara kwa mara juu ya malengo yako na kusudi lako katika kushinda hofu.

Nimatumaini yangu kuwa umepata maarifa ambayo yatakusaidia Kushinda hofu na hivyo kuweza kupata mafanikio makubwa kwenye maisha yako. Kama una swali au maoni yoyote, usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.

Katika maisha tunaelewa kuwa kila mmoja wetu ana ndoto na matamanio makubwa ya kuwa na mafanikio, lakini mara nyingi tunajikuta tukisita au kushindwa kutimiza malengo ambayo tumekuwa tukitamani kuyafikia. Hapa ndipo umuhimu wa kuwa na mbinu sahihi ya kuweka malengo unapojitokeza. Kwa kuwa wewe ni mtu mwenye hamu ya kufikia mafanikio katika maisha yako, ninakualika kufuatilia makala hii ya jinsi ya kuweka malengo ambayo itakupa maelezo na vidokezo muhimu juu ya jinsi ya kuweka malengo yako na hivyo kuweza kufikia mafanikio ambayo umekuwa ukiyatamani.

Kupitia makala hii, utagundua maana halisi ya malengo, jinsi ya kutambua malengo yako binafsi, kuyaandika kwa njia sahihi, na hatua muhimu za kuweka malengo yako katika vitendo. Pia, nitazungumzia jinsi ya kuweka mpango thabiti wa kufikia malengo yako na kushinda vikwazo vinavyoweza kukuzuia kufikia mafanikio hayo.
.
Malengo nini?

Kimsingi malengo ni matokeo au mafanikio ambayo mtu au kikundi hukusudia kufikia. Ni viashiria vya mwelekeo wetu katika maisha na hutusaidia kuwa na dira ya maisha yetu ya baadaye. Malengo hutoa mwongozo katika kukamilisha mambo muhimu katika maisha yetu.

Mifano ya malengo.
Sasa, hebu tuangalie baadhi ya mifano ya malengo. Kwa mfano, hebu tuchukulie unataka kufanikiwa kifedha, unaweza kuweka malengo yako kuwa:

1.Kuwa na akiba ya kutosha: unaweza kuweka lengo la kuweka akiba fulani kila mwezi ili uweze kuwa na akiba ya kifedha na kuwa na uhakika kwa mahitaji yako ya siku zijazo.

2.Kuanzisha biashara yako: kama unatamani kuwa mfanyabiashara unaweza kuweka lengo la kuanzisha biashara yako mwenyewe. Lengo hili linaweza kujumuisha hatua kama vile kujifunza zaidi kuhusu aina ya biashara unayotaka kuingia, kuandaa mpango wa biashara, kupata mtaji, na hatimaye kuanzisha biashara yako.

3.Kuwa na uhuru wa kifedha: kama unatamani kufanikiwa kifedha na hivyo kuwa na uhuru wa kifedha, unaweza kuweka lengo la kuwa na vyanzo mbalimbali vya mapato ambavyo vitakuletea kiasi kikubwa cha fedha. Hii inaweza kujumuisha uwekezaji katika mali isiyohamishika, kuanzisha biashara au kujenga mtandao wa mapato yanayotokana na vyanzo mbalimbali vya mapato.

Hii ni mifano michache tu ya malengo ya kifedha, lakini malengo yanaweza kuhusiana na maeneo mengine ya maisha kama vile afya, elimu, mahusiano, na kadhalika. Ni muhimu kutambua malengo yako katika maisha ili uweze kujielekeza na kuchukua hatua sahihi kuelekea mafanikio unayotaka.

Jinsi ya kuweka malengo Ili kuwa na mafanikio makubwa.

Sasa hebu tuangalie hatua zinazoweza kukusaidia kuweka malengo yako binafsi ili uweze kufikia mafanikio yako:

1.Tengeneza malengo yako kuwa mahususi(specific):

Badala ya kuwa na lengo la jumla kama “Nataka Kufanikiwa,” fikiria kwa undani na uweke malengo maalum ambayo unataka kufikia. Kwa mfano, badala ya kusema “Nataka kuboresha afya yangu,” unaweza kusema “Nataka kupunguza uzito wangu kwa kilo 10 katika kipindi cha miezi 6.”

2.Andika malengo yako:

Kuandika malengo yako kunasaidia kuyafanya yawe ya kweli na yenye nguvu zaidi. Chukua muda kueleza kwa kuandika malengo yako kwenye karatasi au katika diary yako. Hii itakusaidia kuwa na kumbukumbu na kukuwezesha kufuatilia maendeleo yako.

3.Weka muda uliopanga kufikia malengo yako:

Kuweka muda uliopanga kufikia malengo yako kutakusaidia kuwa na utaratibu na kufanya kazi kuelekea malengo yako. Weka tarehe ya mwisho kwa kila lengo na uweke alama katika kalenda yako ili iweze kukujulisha ni lini unataka kufikia malengo hayo.

4.Vunja malengo yako sehemu ndogondogo:

Malengo makubwa yanaweza kuonekana kuwa ni vigumu kuyafikia. Kwa hiyo, vunja malengo yako makubwa kwenye sehemu ndogondogo ambazo ni rahisi kufikia. Kwa mfano, ikiwa lengo lako ni kumaliza masomo yako, unaweza kuweka lengo la kusoma kwa saa moja kwa siku badala ya kuwaza kumaliza masomo yote kwa wakati mmoja.

5.Jifunze na jitathmini:

kujifunza na kujitathmini ni muhimu katika mchakato wa kuweka malengo. Tafuta maarifa na ujifunze kutoka kwa wataalamu wengine au vitabu vinavyohusu maeneo unayopenda kufanikiwa. Pia, jifunze kutathmini maendeleo yako mara kwa mara ili uweze kubainisha ni wapi unahitaji kufanya marekebisho na kuendelea kusonga mbele.

6.Kuwa na nidhamu binafsi:

Kuweka malengo kunahitaji nidhamu. Jiwekee ratiba, fanya kazi kila siku kuelekea malengo yako, na tambua kuwa kuna kipindi utapitia changamoto. Kuwa na utayari wa kufanya kazi ngumu na kuweka juhudi katika kufikia malengo yako.

7.Weka malengo yenye umuhimu kwako:

Hakikisha kuwa malengo unayoweka ni muhimu kwako binafsi na yanalingana na maono yako ya maisha. Kuwa na malengo ambayo yanakuvutia na kukusisimua kunakupa motisha na hamasa ya kufanya kazi kwa bidii kufikia mafanikio hayo.

8.Tengeneza malengo yako kuwa SMART:

SMART ni njia bora ya kuweka malengo yako. SMART ni kifupisho cha maneno ya Kingereza ambayo ni :

Specific (Maalum): Malengo yako ni lazima yaeleze kwa uwazi ni nini hasa unachotaka kufikia kwenye maisha yako. Kwa mfano: Ninataka kuwa na akiba ya milioni tano ndani ya mwaka mmoja.

Measurable (Yanayoweza kupimika): Malengo yako lazima yaweze kupimika. Kwa mfano, kwa kutumia mfano hapo juu, kipimo kitakuwa ni kuweza kuweka akiba ya milioni tano.

Attainable (Yanayoweza kufikiwa): Hapa lazima uangalie malengo unayoweka kama yanawiana na uwezo ulio nao.

Relevant (Yanayohusiana): Lazima malengo yako yaendane na maono au njozi zako za maisha.

Time-bound (Yenye kipindi): Lazima malengo yako yawe na muda maalumu.

Hakikisha malengo yako yanajumuisha vipengele vyote hivi ili yaweze kuwa wazi na yanayoweza kufikiwa.

9.Weka mpango wa hatua za kufikia malengo yako:

Baada ya kuweka malengo yako, weka mpango unaoelezea hatua za kufanya ili kufikia malengo hayo. Kugawanya malengo yako kwenye hatua ndogondogo kutafanya iwe rahisi kufanyia kazi malengo yako. Weka hatua hizo kwenye kalenda na uhakikishe unazingatia kufanya kila hatua ipasavyo.

10.Tafuta msaada:

Kuweka malengo ni rahisi, lakini kufikia malengo hayo inaweza kuwa changamoto. Tafuta msaada kutoka kwa marafiki, familia, au hata kwa kocha wa maisha (life coach) ili aweze kukusaidia kukua, kukusisimua, na kukufuatilia katika safari yako kuelekea mafanikio. Pia, jiunge na vikundi vya usaidizi kama vile mtandao wa watu wenye malengo sawa na ya kwako au watu wanaopenda mafanikio.

11.Kuwa na subira na ukabiliane na vikwazo:

Kutimiza malengo kunahusisha safari ya muda mrefu na inaweza kukutana na vikwazo na changamoto njiani. Kuwa na subira na usikate tamaa. Kumbuka kuwa kila kushindwa au kuchelewa kufikia mafanikio kunakuletea mafunzo na uzoefu, na ni fursa ya kukufanya ukue zaidi.

12.Badilisha na badilika:

Malengo yako yanaweza kubadilika kadri unavyoendelea kukua. Ikiwa unaona kuwa malengo yako hayajakidhi maono yako ya maisha, jisikie huru kuyabadilisha ili yalingane na hali yako ya sasa na matarajio yako.

Kuweka malengo yako ni hatua muhimu katika kufikia mafanikio. Ni njia ya kujiweka mwenyewe katika udhibiti wa maisha yako na kujenga mwelekeo wako. Kwa kuzingatia hatua hizi na kujituma katika kufikia malengo yako, unaweza kufanikiwa katika maisha yako. Hakikisha kuwa malengo yako ni ya kweli, yanazingatia maono yako, na unajituma kuyafanikisha. Pia, kuwa tayari kurekebisha na kubadilisha malengo yako kulingana na mabadiliko ya maisha na vipaumbele vyako.

Kwa leo niishie hapa. Kama una maoni yoyote au swali usisite kuandika hapa chini. Pia unaweza kuwasiliana nami moja kwa moja kwa simu namba 0752 081669. Asante na karibu katika makala zinazofuata.

Katika maisha ili uweze kufanikiwa ni lazima uwe na vipaumbele vya mambo unayopaswa kuyafanya. Je, umewahi kujikuta ukishindwa kuweka vipaumbele katika maisha yako? Labda umekuwa ukitanguliza mambo yasiyo na umuhimu wakati mambo muhimu ambayo yanachangia mafanikio yako unayaacha? Hakuna haja ya kujishtukia, ukweli ni kwamba kuweka vipaumbele ni changamoto kubwa sana kwa watu wengi. Hata hivyo, katika makala hii nitakushirikisha jinsi ya kuwa na vipaumbele na hivyo itakusaidia kuanza kuweka vipaumbele kwa ufanisi zaidi katika maisha yako.

Vipaumbele ni nini?
Vipaumbele ni mambo muhimu ambayo unayachagua kuyafanyia kazi kwa wakati huu ili kufikia malengo yako.
Kwa kuchagua vipaumbele, unaweza kujua njia sahihi ya kufikia malengo yako. Vipaumbele vinaweza kukusaidia kuchagua na kufanya kazi sahihi na kuhakikisha kwamba unazingatia kazi hiyo kwa muda muafaka. Kwa hiyo, ni muhimu kuchagua vipaumbele sahihi ili uweze kufikia malengo yako kwa ufanisi.

Katika maisha, vipaumbele vinaweza kuwa tofauti kwa kila mtu. Kwa mfano, mtu mmoja anaweza kuwa na kipaumbele cha kujenga nyumba na mwingine kuanzisha biashara na kadhalika.Kwa hiyo, kila mtu anapaswa kuchagua vipaumbele vyake kulingana na malengo yake na hali yake ya maisha. Ni muhimu kuzingatia vipaumbele vyako na kuchukua hatua Ili uweze kufikia malengo yako katika maisha.

Kwa nini unapaswa kuweka vipaumbele?

Kuna sababu kadhaa kwa nini unapaswa kuweka vipaumbele katika maisha yako. Miongoni mwa sababu hizo ni hizi zifuatazo:

1.Kuweka malengo wazi:

Vipaumbele vinakusaidia kuweka malengo wazi na kujua ni nini unatakiwa kufikia. Hii itakupa mwongozo ambao utakufanya ujikite kufanya kazi kuelekea kwenye vipaumbele vyako badala ya kutangatanga bila mwelekeo.

2.Kutumia muda kwa ufanisi:

Kwa kuweka vipaumbele, utaweza kutumia muda wako kwa ufanisi zaidi. Hii ni kwa sababu, utakuwa unajua ni nini kinachohitaji kipaumbele chako na hivyo utaweza kuzingatia kuweka juhudi zako kwenye kazi muhimu zenye kuleta mafanikio kwenye maisha yako.

3.Kuepuka msongamano wa mambo:

Bila vipaumbele, unaweza kujikuta umeshughulika na mambo mengi kwa wakati mmoja, na hivyo kusababisha kutofanikiwa kwa kazi zako. Kwa kuweka vipaumbele, unaweza kuepuka kuwa na msongamano wa mambo na hivyo kufanya kazi kwa utaratibu na ufanisi.

4.Kufikia malengo yako:

Vipaumbele vinakusaidia kufikia malengo yako kwa njia sahihi na yenye ufanisi. Unapoweka vipaumbele, unajua ni nini kinachohitajika kufanyika kwa muda muafaka na hatua ambazo unapaswa kuzichukua ili kufikia malengo yako.

Kwa hiyo, kuweka vipaumbele ni muhimu katika kufikia malengo yako na kufanya kazi kwa ufanisi zaidi.

Hatua za kuweka vipaumbele Katika maisha.

Kuna hatua kadhaa unazoweza kufuata ili uweze kuweka vipaumbele katika maisha yako:

1.Tambua malengo yako:

Anza kwa kutambua malengo yako ya muda mfupi na mrefu. Fikiria ni nini unataka kufikia katika maisha yako na ni nini kinachokufanya uwe na furaha na kuridhika.

2.Panga malengo yako kwa vipindi:

Baada ya kutambua malengo yako, panga malengo yako kwa vipindi vya muda. Kwa mfano, unaweza kuweka malengo ya kufikia mwaka huu, miaka mitano ijayo, na kadhalika.

3.Tathmini vipaumbele vyako:

Tathmini malengo yako na uamue ni yapi unayotaka kuyapa kipaumbele. Ni malengo gani yanahitaji kipaumbele zaidi na ni yapi yanaweza kusubiri.

4.Panga kazi zako:

Baada ya kutathmini vipaumbele vyako, panga kazi zako kulingana na vipaumbele hivyo. Anza na kazi muhimu zaidi na uendelee kufanya kazi kulingana na vipaumbele vyako.

5.Fuatilia maendeleo yako:

Fuatilia maendeleo yako kwa kufuatilia kazi zako na kuhakikisha unafanya kazi kulingana na vipaumbele vyako. Kufuatilia maendeleo yako kunakusaidia kujua ni wapi unahitaji kufanya marekebisho na kuboresha kazi yako.

Kwa hiyo, kwa kufuata hatua hizi, unaweza kuweka vipaumbele vyako na kufikia malengo yako kwa ufanisi zaidi.

Ni vigezo gani unavyoweza kutumia kuweka vipaumbele katika maisha yako?

Kuna vigezo kadhaa unavyoweza kutumia kuweka vipaumbele katika maisha yako, ikiwa ni pamoja na:

1.Malengo yako:

Fikiria malengo yako ya muda mfupi na mrefu na uweke vipaumbele kulingana na malengo hayo.

2.Muda:

Tathmini muda wako na uweke vipaumbele kulingana na muda ulionao. Weka kipaumbele kwenye kazi ambazo zinahitaji kufanyika kwa haraka na uweke kando kazi ambazo zinaweza kusubiri.

3.Uwezo wako:

Tathmini uwezo wako na uweke vipaumbele kulingana na uwezo wako. Weka kipaumbele kwenye kazi ambazo unaweza kufanya vizuri na uweke kando kazi ambazo unahitaji msaada zaidi.

4.Maadili yako:

Fikiria maadili yako na uweke vipaumbele kulingana na maadili hayo. Weka kipaumbele kwenye kazi ambazo zinakufanya uhisi unafanya kitu sahihi na uweke kando kazi ambazo zinakinzana na maadili yako.

5.Matokeo:

Tathmini matokeo ya kazi zako na uweke vipaumbele kulingana na matokeo hayo.Weka kipaumbele kwenye kazi ambazo zinaleta matokeo mazuri na uweke kando kazi ambazo hazina matokeo mazuri.

Kwa hiyo, kwa kutumia vigezo hivi, unaweza kuweka vipaumbele vyako na kufikia malengo yako kwa ufanisi zaidi.

Ni matumaini yangu kuwa umepata maarifa ya kutosha ambayo yatakusaidia kufanikiwa katika maisha yako kwa kuweka vipaumbele ambavyo vitakuletea matokeo makubwa katika maisha yako. Kama una maoni au swali lolote, usisite kuandika maoni yako hapa chini. Pia unaweza kuwasiliana nami moja kwa moja kupitia namba 0752 081669. Asante sana na karibu katika makala zinazofuata.

Katika maisha, kuna sababu nyingi sana ambazo huwa zinasababisha watu washindwe kutimiza malengo yao. Lakini kuna sababu tatu kubwa ambazo zimesababisha watu wengi washindwe kufikia mafanikio kwenye malengo yao. Kimsingi sababu hizi ukiweza kuzikabili, utaweza kutimiza malengo yako kwa haraka sana. Katika makala ya leo nitakushirikisha sababu 3 Zinazozuia usifanikishe malengo yako.

Sababu 3 Zinazozuia usifanikishe malengo yako.

1.Kushindwa kufanya maamuzi.
Watu wengi wameshindwa kufanikiwa kwenye malengo yao na katika maisha yao kwa ujumla kwa sababu walishindwa kufanya maamuzi. Hata wewe inawezekana bado hujafanikiwa kutimiza malengo yako kwa sababu umeshindwa kufanya maamuzi ambayo yangebadilisha maisha yako. Sababu kubwa zinazofanya watu washindwe kufanya maamuzi ni pamoja na hizi zifuatazo:

i. Wanaogopa kujihatarisha (taking risk)
Watu wanaogopa kufanya maamuzi kwa kuogopa kujihatarisha. Wanaogopa kuwa itakuwaje. Hata wewe inawezekana ulitakiwa ufanye maamuzi fulani ambayo yangebadilisha maisha yako, lakini umekuwa ukiogopa itakuwaje ukishindwa kufanikiwa. Kumbuka kuwa, hata usipofanya maamuzi, bado utakuwa unajihatarisha. Unajihatarisha kwa sababu hautafanikiwa.

ii. Wanaogopa watu watawaonaje.
Watu wengi huwa wanashindwa kufanya maamuzi sahihi yakayotimiza malengo yao kwa kuogopa watu watawaonaje. Hata wewe inawezekana unahitajika kufanya kazi fulani, biashara fulani au unahitaji kujiendeleza kielimu, lakini unahofia watu watakusemaje. Kumbuka kuwa, hata usipofanya maamuzi, bado utasemwa tu. Hivyo, ni bora ufanye maamuzi kwani hatma ya maisha yako ipo mkononi mwako.

iii. Wanaamini maisha ni majaaliwa.
Watu wengi ambao huwa wanashindwa kufanya maamuzi wanaamini ipo siku watafanikiwa kwani mafanikio ni majaaliwa. Hivyo hawako tayari kupambania maisha. Hivyo, kama unataka kufanikiwa katika maisha yako, hakikisha unafanya maamuzi bila kuchelewa.

2.Kutokukamilisha mambo.
Hili ni tatizo kubwa sana linalozuia usifanikishe malengo yako. Watu wengi wamekuwa na tabia ya kuanzisha mambo lakini wanashindwa kuyakamilisha. Hata wewe inawezekana ulianza biashara fulani au kazi fulani lakini ukaishia njiani. Inawezekana ulianza kusoma kitabu lakini umeishia njiani na kadhalika. Kumbuka kuwa hauwezi kufanikiwa kwa kuanzisha mambo, bali utafanikiwa kama utakuwa unakamilisha mambo uliyoyaanzisha. Hivyo ninakukumbusha kuwa, ili uweze kufanikisha malengo yako, hakikisha mambo unayoyaanzisha unayakamilisha.

3.Kufanya mambo na kuacha.
Hili ni tatizo kubwa sana linalozuia mafanikio ya watu wengi. Unakuta mtu leo anaanzisha biashara hii baada ya muda mfupi anaona haimlipi anahamia kwenye biashara nyingine. Baadaye anaona nayo haimlipi anahamia kufanya kitu kingine. Unakuta kila kitu anachokifanya kinakuwa hakina mwendelezo. Kumbuka kuwa, ili uweze kufanikiwa, ni lazima ufanye kitu kimoja kwa muda mrefu. Hata kama utakiona hakikulipi lakini baada ya muda kitakuletea mafanikio makubwa.

Swali la leo:
Ni kitu gani ambacho ulianza kukifanya halafu ukaishia njiani?

Ninatamani sana unishirikishe kwa kuandika hapa chini kwenye sanduku la maoni nami nitakurudia ili tupeane ushauri zaidi. Pia kama una swali lolote usisite kuandika swali lako au kwa kuwasiliana nami kwa simu namba 0752 081669. Asante na karibu kwenye makala zijazo.

Kila mmoja amepewa masaa 24 katika siku moja. Lakini, jinsi tunavyotumia masaa tuliyopewa ndiyo itaashiria kiwango cha mafanikio yetu. Watu waliofanikiwa huwa wanatumia vizuri sana masaa ndani ya siku ili waweze kutimiza malengo yao na kufanikiwa katika maisha yao. Sasa, ni kwa jinsi gani watu waliofanikiwa hutumia muda wao? Wengi wao wanafahamu kanuni ya Parkinson na hivyo huwa wanatumia kupanga muda wao. Katika makala ya leo nitakushirikisha jinsi ya kutumia muda wako vizuri.

Kanuni ya Parkinson inasema hivi:
“Work expands to fill the time available for completion.”
Kwa lugha ya kiswahili ni kuwa, kazi huwa inachukua muda wote ulioutenga wa kuikamilisha.

Hii ina maanisha kuwa, haijalishi ni muda mrefu kiasi gani ulioutenga kwa ajili ya kufanya kazi fulani, kwa muda ulioutenga, kazi yako itakamilika kwa muda huohuo. Kama umetenga muda mfupi, na kazi yako itakamilika ndani ya muda mfupi. Kwa mfano, kama umetenga dakika ishirini za kufanya kazi fulani, utatumia dakika hizo hizo ishirini kukamilisha kazi hiyo. Sasa anza kutumia kanuni ya Parkinson kwa faida kwa kufuata hatua hizi 5.

1.Weka malengo na vipaumbele.
Hatua ya kwanza ya kutumia kanuni ya Parkinson ni kuandika malengo yako na vipaumbele. Elezea kwa nini kazi hii uipe kipaumbele cha kwanza na endelea kuainisha kazi zako zote za siku kwa vipaumbele vyake na kila kazi uipatie muda wa kuikamilisha.

2. Ainisha vikwazo na changamoto ambazo unahisi zinaweza kujitokeza.
Weka orodha ya vikwazo au changamoto ambazo unahisi zinaweza kujitokeza unapokuwa ukitekeleza kazi zako. Hii ni hatua ya muhimu sana, usiiruke. Unapokuwa umefikiria mapema vikwazo au changamoto ambazo zinaweza kujitokeza, utaweza kuziepuka au kuzifanyia kazi mapema hivyo kuokoa muda na kufanya kwa ubora.

3. Weka muda wa kutimiza kila kazi.
Baada ya kukamilisha hatua za mwanzo, basi unatakiwa kugawa muda kwa kila kazi. Kama kazi zako zitakuwa na sehemu ndogondogo, unaweza pia kila kazi ndogo ukaigawia muda wake. Lengo ni kuhakikisha muda wako haupotei. Hii itakusaidia kuwa na picha kamili kuwa kazi zako zote za siku zitatumia muda kiasi gani.

4. Tambua na uondoe vitu vyote ambavyo huwa vinapoteza muda (time wasters)
Hii ni hatua ya muhimu sana ambayo itakusaidia kutunza vizuri muda wako. Unapokuwa umemaliza kazi moja, kuwa makini sana na uepukane na vitu vingine ambavyo vitakuchukulia muda wako ambavyo haviendani na kazi zako. Miongoni mwa vitu hivyo vinaweza kuwa, kujibu barua pepe ambazo hazina umuhimu, kuingia kwenye mitandao ya kijamii, kupoteza muda Whatsapp kwa vitu ambavyo siyo vya msingi na kadhalika.

Katika makala ya leo tumeangalia jinsi ya kutumia muda vizuri ili kuwa na mafanikio. Kwa kutumia kanuni hii ya Parkinson, utaweza kutumia muda wako vizuri na kufanya mambo makubwa ndani ya siku.

Swali la leo:
Tayari umejifunza kuhusu kanuni ya Parkinson, utaitumiaje kutunza muda wako vizuri?
Ninatamani sana unishirikishe kwa kuandika hapa chini kwenye box la maoni. Pia kama una maoni yoyote au swali, usisite kuandika hapa chini. Asante na karibu kwenye makala zijazo.

Hivi umeshawahi kupitia kipindi ambacho umekuwa ukijihisi hauna furaha katika maisha yako? Kila kitu unachokifanya unaona kabisa kinakuletea furaha ya muda mfupi tu na baadaye furaha yako inatoweka. Tatizo ni kuwa, umekuwa ukitafuta furaha bila kuwa na kanuni madhubuti ambazo zitakuletea furaha ya kudumu katika maisha yako. Hivyo, ili uweze kuwa na furaha katika maisha yako, unaohitajika kuwa na muda wa kuweka kanuni ambazo zitakuletea furaha katika maisha yako. Katika makala ya leo nitakushirikisha kanuni 3 za kuwa na maisha yenye furaha.

Kanuni 3 za kuwa na maisha yenye furaha.

1.Kuwa mtu mwenye malengo.
Miongoni mwa kanuni ya muhimu sana ya kuwa na maisha yenye furaha ni kuwa mtu mwenye malengo. Ili uweze kuwa na furaha, unahitajika kuweka malengo ambayo yataendana na kusudi la maisha yako na kuyafanyia kazi kila siku. Hii itakupa ramani halisi ya mwelekeo wa maisha yako na jinsi ambavyo utaitumia kila siku kuweza kutimiza malengo yako. Kwa kufanya hivyo utakuwa ukisogelea mafanikio yako na hivyo furaha yako kuongezeka. Kwa kufanyia kazi malengo uliyoyaandika, utajihisi furaha unapokuwa ukipiga hatua kwa kukamilisha lengo moja baada ya lingine kwa siku hiyo. Siku inapokuwa imeisha na ukaangalia nyuma mambo uliyoyatimiza, utajiona mwenye furaha kwani utakuwa unapiga hatua kuelekea kwenye mafanikio yako.

2.Kuwa mtu unayetaka matokeo.
Unapokuwa umeandika malengo yako, utaweza kupima maendeleo yako kwa kuweka vigezo vya mafanikio. Vigezo hivi vitakuwezesha kufahamu mafanikio yako hatua kwa hatua. Utaweza kufahamu ni hatua gani uliyofikia na ni hatua gani zaidi zinahitajika kuweza kufikia matokeo uliyoyakusudia. Unapokuwa unapima hatua za mafanikio yako, utaweza pia kujifunza muda ulioutumia na hivyo kukujengea tabia ya kutunza muda. Kadiri unavyokuwa unapiga hatua kwenye mafanikio uliyojiwekea kwa kutumia vigezo vya mafanikio ulivyoviweka, ndivyo utakavyokuwa na furaha zaidi katika maisha yako.

3.Endelea kuchukua hatua bila kuacha.
Kwa kuwa kuweka malengo ni jambo la muhimu sana ambalo litakupa hamasa ya kufanya kazi, ni muhimu kuendelea kuchukua hatua bila kuacha. Kumbuka, kuwa na malengo yaliyoandikwa bado haitoshi. Unahitajika kuchukua hatua kufanyia kazi malengo yako bila kuacha. Unapokuwa unapiga hatua haijalishi ni kubwa au ni ndogo kiasi gani, furaha yako itaongezeka.

Swali la leo.
Ni kanuni gani kati ya hizi tatu za kuwa na maisha yenye furaha utaanza kuitumia leo?
Ninatamani sana unishirikishe kwa kuandika kwenye sanduku la maoni hapa chini. Pia kama una swali au maoni yoyote, usisite kuandika hapa chini. Asante na karibu tena katika makala ijayo.

Katika maisha siyo jambo jepesi kujiamini ikiwa umepitia changamoto zilizokuumiza na hivyo kukukatisha tamaa. Unapokuwa umejenga uwezo wa Kujiamini, utaweza kutatua changamoto zinazokukabili na hivyo kufanikiwa katika malengo uliyojiwekea na katika maisha yako kwa ujumla. Kwa kuwa kujiamini ni jambo la muhimu sana katika kufikia mafanikio yako, katika makala ya leo nitakushirikisha njia 5 za kujenga uwezo wa kujiamini.
Njia 5 za kujenga uwezo wa kujiamini.

1. Jifunze kujisamehe.
   Jambo la kwanza unapojenga uwezo wako wa kujiamini ni kujifunza kujisamehe. Tambua kuwa wewe ni binadamu na hivyo haujakamilika. Hivyo, jifunze kujisamehe kwa changamoto ambazo umewahi kuzipitia na ujifunze kujisemea maneno chanya. Jizoeze kujisemea kuwa pamoja na changamoto unazopitia, unafanya kadiri ya uwezo wako wote kuweza kutatua changamoto zinazokukabili.
2. Jipe nafasi.

Unapokuwa umejisamehe, jipe nafasi ya kusema hapana kwa mambo ambayo hutaki kuyafanya, kwa mambo yote ambayo yanakukosesha furaha na kwa mambo yote ambayo yanakufanya ukate tamaa na hivyo kukuondolea nguvu na hamasa ya kufanya kazi ili kutimiza malengo yako. Hii itasaidia akili yako kuwaza vitu vipya na kuleta ubunifu mpya ambao utakusaidia kusonga mbele kwenye malengo yako. Jipe nafasi ya kufurahia na marafiki zako katika michezo mbalimbali unayoipenda. Kwa kufanya hivyo utaongeza uwezo wako wa kujiamini.

3. Weka malengo na uyafuatilie.
Hatua inayofuata ni kuweka malengo na kuanza kuyafanyia kazi. Kwa kila lengo utakalokuwa unatimiza, litakujengea uwezo wa kujiamini zaidi na zaidi na kukupa hamasa ya kuendelea kufanyia kazi malengo mengine. Hivyo, unapokuwa umetimiza malengo makubwa, utaongeza uwezo wako wa kujiamini.

4. Wekeza zaidi kwenye uwezo ulionao na ufanyie kazi mapungufu yako.
Kila mmoja ana uwezo katika mambo fulani na mapungufu katika mambo mengine. Hakuna mwanadamu aliyekamilika. Hivyo, njia nyingine ya kuongeza uwezo wako wa kujiamini ni kukuza uwezo wako na kufanyia kazi mapungufu yako. Utashangaa kuona kuwa, kadiri unavyowekeza zaidi kwenye uwezo ulionao, utaongeza uwezo wako wa kujiamini. Pia uwezo wako wa kujiamini utaongeza pale utakapoanza kufanya vizuri kwenye vitu ambavyo vilikuwa ni changamoto kwako. Unapofanyia kazi mapungufu yako, utaona kuwa uwezo wako wa kujiamini ukiongezeka.

5. Furahia mafanikio yako.
Katika hatua za kujenga uwezo wa kujiamini, usisahau kujipongeza kwa mambo yote ambayo umefanikiwa kuyatimiza. Kwa kufanya hivyo, utaongeza uwezo wako wa kujiamini kwani, utaona mambo uliyoyafanya na ukafanikiwa kuyakamilisha. Jipongeze na ufurahie mafanikio yako haijalishi ni makubwa au ni madogo kiasi gani kwani yataongeza uwezo wako wa kujiamini.
Kujiamini kwenye uwezo ulionao ni njia ya pekee na yenye nguvu sana itakayokuwezesha kufanya mambo makubwa katika maisha yako.
Hivyo basi, kwa kufuata hizi njia 5 zitakusaidia kujenga uwezo wako wa kujiamini na hivyo kufanya mambo makubwa katika maisha yako.
Swali la leo:
Ni mafanikio gani makubwa katika malengo yako utayafurahia ili kuongeza uwezo wako wa kujiamini?
Ninatamani sana unishirikishe kwa kuandika kwenye sanduku la maoni hapa chini.

Watu wengi huwa wanatamani sana kupata mafanikio katika maisha na kazi zao. Kama vile mbegu, huwa wanafanya kile wanachotakiwa kufanya ili waweze kupata mafanikio wanayoyatamani. Lakini, kitu ambacho huwa kinapungua ni udongo ambao utasababisha mbegu iote na kukua. Udongo huo ni malengo. Hivyo, ili uweze kufanikiwa katika kazi yako, biashara yako na maisha yako kwa ujumla, unahitajika kuweka malengo. Unatakiwa utenge muda, uyaandike kwa ufasaha na namna ambavyo utayatekeleza. Katika makala hii, nitakushirikisha sababu tano za wewe kuanza kuweka malengo.
Sababu 5 za wewe kuanza kuweka malengo.
1. Malengo yanakupa mwelekeo (focus)
Mojawapo ya kitu cha msingi sana katika mafanikio ni kutambua unahitaji nini katika maisha yako. Hivyo, ukiwa na malengo na umeyaandika, yatakusaidia kufanya kazi kwa bidii ukiwa umelenga kile tu unachohitaji katika maisha yako. Hivyo kuweka malengo kutakusaidia usipoteze muda wako kwa mambo ambayo siyo ya muhimu kwenye maisha yako.
2. Malengo yatakusaidia kupima maendeleo yako.
Unapokuwa umeweka malengo, yatakusaidia kuweza kupima mafanikio kwenye kila hatua unayopitia kwenye maisha yako. Unapokuwa umekamilisha lengo moja utaweza kuona ni kwa kiwango gani umeweza kufanikiwa na hivyo kukupatia hamasa ya kuendelea mbele zaidi kutimiza malengo mengine. Kama haujaweka malengo, hautaweza kufahamu chochote kwa sababu hautakuwa na kitu cha kupima mafanikio yako. Hautafahamu umefikia wapi na umekwama wapi kuelekea kwenye mafanikio yako.
3. Malengo yatakupatia hamasa (Motivation)
Unapokuwa umeweka malengo, yatakupatia hamasa ya kufanya kazi kwa bidi zote ili uweze kuyatimiza. Aina hii ya hamasa ni ya muhimu sana kwani hata kama utapata changamoto, kwa kuwa una malengo, utakuwa na nguvu ya kupambana kufikia mafanikio uliyoyakusudia. Kumbuka kuwa, unapokuwa una malengo, utaona thamani halisi ya kile unachokifanya na hivyo hautakata tamaa.
4. Malengo yatakusaidia kutokughairisha mambo (procrastination)
Kila mtu huwa anapitia changamoto ya kughairisha mambo kwenye maisha yake. Tabia hii inachangia sana watu wengi kushindwa kufanikiwa kwenye maisha yao. Hivyo, unapokuwa umeweka malengo, utaweza kukabiliana na changamoto hii kwa sababu utakuwa unafahamu kwa ufasaha nini unahitaji kwenye maisha yako na hatua muhimu za kuchukua ili uweze kufikia malengo yako.
5. Malengo yatakuwezesha kufanikiwa.
Moja ya kitu cha msingi sana unapokuwa umeweka malengo ni kuwa, yatakusukuma kutumia nguvu zako zote kuweza kufikia maisha unayoyatamani. Hivyo, kutokana na malengo, utaweza kuchukua hatua za msingi kwenye maisha yako bila kupoteza nguvu na muda wako kwenye mambo ambayo hayachangii kwenye mafanikio yako.
Hivyo basi, kama umekuwa ukipambana sana kupata mafanikio kwenye maisha yako, jambo la kwanza unalotakiwa kufanya ni kuangalia kama umeweka malengo. Hivyo, katika makala hii nimeelezea kwa kina faida tano ambazo utazipata utakapokuwa umeweka malengo katika maisha yako.
Swali la leo:
Ni lengo gani kubwa uliloliweka kwa mwaka huu?
Ninatamani sana unishirikishe kwa kuweka maoni yako kwenye sanduku la maoni hapa chini.

Aristotle aliwahi kusema maneno yafuatayo:
“95% of everything you do is the result of your habit.”
Kwa tafsiri ya kiswahili maana yake ni kuwa, asilimia 95 ya kila kitu unachokifanya inatokana na tabia yako.
Hapa inamaanisha kuwa, ukitaka kuwa na mafanikio ni lazima ujenge tabia za mafanikio. Fanya vitu vinavyochangia kwenye mafanikio yako na ujitahidi kuvifanyia mazoezi mpaka vigeuke kuwa ndiyo tabia yako na ujizuie kufanya vitu ambavyo havina mchango wowote kwenye mafanikio yako. Katika makala ya leo nitakushirikisha tabia 6 za watu waliofanikiwa.
Ninawezaje kujenga tabia?
Tabia yoyote iwe nzuri au mbaya inajengwa kwa kurudiarudia (repetition). Hivyo kama unahitaji kujenga tabia njema za mafaniko ni sharti uwe tayari kuzirudiarudia kila siku. Baada ya muda utazoea kuzifanya na hivyo zitabadilika na kuwa ndiyo tabia yako. Katika makala hii tutaangalia tabia za watu waliofanikiwa.
Tabia 6 za watu waliofanikiwa.
1. Wanaweka malengo ya siku (daily goal setting)
Watu waliofanikiwa huwa wanaweka malengo ya siku. Hivyo ili uweze kufanikiwa ni lazima uwe na tabia ya kuweka malengo yako ya siku. Unapoenda kulala, hakikisha umeweka malengo yako ya siku inayofuata. Unapoamka unapaswa kufanya kazi zako kwa bidii ili uweze kutimiza malengo ya siku uliyojiwekea. Umuhimu wa kuweka malengo ya siku ni kuwa, unapoweka malengo na unayafikiria muda wote, utaweza kuyatimiza kwani utakuwa na hamasa ya kuyatimiza. Hivyo, watu waliofanikiwa huwa wanafikiria juu ya malengo yao muda wote.
2. Huwa ni watu wanaolenga kupata matokeo (result oriented)
Watu waliofanikiwa huwa wanafikiria kiwango cha matokeo watakayopata kwenye malengo waliyojiwekea. Hivyo, ili uweze kufanikiwa, kuweka malengo pekee haitoshi, ni lazima uwe na kipimo kitakachokusaidia kuona kama malengo yako yamefanikiwa au la. Kwa mfano, umeweka lengo la kusoma kitabu kila siku. Hili ni lengo ambalo liko kwa ujumla sana. Ili uweze kupima matokeo ni sharti lengo lako uliweke katika mfumo huu: Nitakuwa nikisoma kurasa 10 za kitabu kila siku. Hivyo, hata katika malengo yako mengine hakikisha unakuwa mtu wa kupima matokeo. Je, ni orodha ya mambo gani uliyoiweka leo? Weka vipaumbele vya mambo yako na vipimo vitakavyokusaidia kuangalia mafanikio.
3. Wanajali sana mahitaji ya watu (people oriented)
Watu waliofanikiwa huwa wanajali sana ni kwa jinsi gani wanaweza kusaidia watu wengine kutatua changamoto zao. Hivyo ili uweze kufanikiwa ni lazima ufikirie unawezaje kutatua changamoto za watu. Iwe kwenye kazi yako au biashara yako, jambo la kwanza kufikiria ni kuwa, biashara yangu au kazi yangu inatatua changamoto gani katika jamii. Kama ni kwenye kazi yako, jali sana watu unaowahudumia. Kama ni kwenye biashara yako, wajali wateja wako kwa kuwapa huduma bora. Jali changamoto za watu na uzitatue nawe utafanikiwa sana kwenye kazi au biashara yako.
4. Wanajali sana afya zao.
Watu waliofanikiwa huwa wanajali sana afya zao. Hii ni kwa sababu wanafahamu kuwa mafanikio yao yanategemea sana kama afya zao zitakuwa bora. Hivyo, ili uweze kufanikiwa, ni lazima mwili wako uwe na afya njema. Jali afya yako kwa kula vizuri, kufanya mazoezi pamoja na kupumzika.
5. Huwa ni waminifu
Waswahili wanasema kuwa, uaminifu ni mtaji. Watu wote waliofanikiwa ni waminifu kwenye kazi zao. Hivyo, ili uweze kufanikiwa, unapaswa kuwa mwaminifu kwenye maisha yako. Unapokuwa mwaminifu kwenye maisha yako, utavuta fursa nyingi sana kuja kwako. Kupitia uaminifu wako, utavutia watu kukupatia mtaji, kazi, masoko na fursa nyingine nyingi.
6. Huwa na nidhamu binafsi (self-discipline)
Nidhamu ndio msingi wa mafanikio yote katika maisha. Maana ya nidhamu ni:
Uwezo wa wewe mwenyewe kufanya kile unachotakiwa kufanya katika muda muafaka bila kujali unajisikia kufanya au la.
Watu waliofanikiwa huwa na nidhamu kubwa sana kwenye maisha yao. Hata wewe ili uweze kufanikiwa, hakikisha unakuwa na nidhamu kwenye maisha yako. Unapokuwa umeweka malengo, hakikisha kuwa unakuwa na nidhamu ya kuyakamilisha kwa muda muafaka. Kwa kufanya hivyo, utafanikiwa sana.
Swali la leo.
Je, ni tabia zipi za mafanikio ambazo unazijenga kwa sasa?
Ninatamani sana unishirikishe kwa kuandika kwenye sanduku la maoni hapa chini.

Mafanikio ni neno ambalo linafahamika na kuzoeleka sana katika jamii yetu, lakini maana yake hasa ni nini? Ni kwa namna gani unaweza kupima mafanikio katika maisha? Je, mafanikio kuwa na utajiri, mamlaka na cheo, au kuna jambo jingine zaidi ya hayo?
Katika makala ya leo, nitaelezea maana ya mafanikio na kudadavua ni kwa jinsi gani unaweza kupima mafanikio ya kweli kwenye maisha yako. Nitaelezea vigezo vya ndani na vya nje ambayo vinachangia mafanikio na ni kwa jinsi gani unaweza kuvitumia kupima mafanikio yako.

Mafanikio ni nini?

Mafanikio yanaweza kutafsiriwa kama kufikia malengo au ndoto za maisha yako. Ni jinsi unavyoweza kutumia uwezo ulio ndani yako (your potential) kuweza kuishi maisha ya furaha na uliyoyakusudia (fulfilling and meaningful life). Kimsingi, mafanikio siyo tu kufikia malengo uliyojiwekea, lakini pia ni kufikia viwango vya maisha ya furaha (fulfilling life).

Mafanikio yanaweza kuwa na maana tofauti kwa watu tofauti pia, hii ndiyo sababu ni lazima kuwa makini kusema “mtu fulani amefanikiwa”. Jambo la msingi hapa ni kuwa, kama unahisi kuwa umefanikiwa, ni lazima uwe na furaha ya maisha baada ya kufikia malengo uliyojiwekea.

Umuhimu wa kupima mafanikio.

Kupima mafanikio ni jambo la muhimu sana. Linakuwezesha kufahamu wapi ulipo na hivyo kukupatia hamasa (motivation) ya kuendelea mbele kufikia malengo uliyojiwekea. Bila kupima mafanikio, unaweza kupoteza mwelekeo wa malengo yako. Kupima mafanikio pia kunakuwezesha pia kufurahia malengo uliyoyafikia, kujifunza kutokana na makosa na kufanya maboresho yanayohitajika.
Katika makala hii pia nitaelezea jinsi ya kupima mafanikio yako kwa kuwianisha vigezo vya ndani (internal factors) na vya nje (external factors).

Vigezo vya ndani (Internal Factors ) vya kupima mafanikio ya kweli

Vigezo vya ndani ni mambo katika maisha yako ambayo yako ndani ya uwezo wako. Vigezo vya ndani ni hivi vifuatavyo:

1. Kuwa na furaha katika maisha yako (Happiness And Fulfillment)

Miongoni mwa vigezo vya muhimu sana vya kuzingatia unapopima mafanikio ni kuangalia kama una furaha ya maisha. Kigezo hiki kinajumuisha:

i. Kufanya kitu au kazi unayoipenda (passion).

ii. Kuwa na mahusiano bora (positive relationship).

iii. Kujua kusudi la maisha yako (Your life purpose) na kufanya vitu vinavyochangia kutimiza kusudi la maisha yako. Sasa hebu tuangalie kila kipengele kwa undani.

i. Kufanya kitu au kazi unayoipenda (passion)

Kufanya kitu kinachoendana na passion yako inamaanisha kufanya kazi unayoipenda na hivyo kufurahia kazi yako, haijalishi unalipwa mshahara kiasi gani au unapata kipato kiasi gani. Inamaanisha kuwa, unaamka kila siku na kuwa na shauku ya kazi yako. Unapokuwa unafanya kazi ambayo ni passion yako, kazi inabadilika kuwa siyo kazi bali inakuwa ni kitu unachokifurahia.

ii. Kuwa na mahusiano bora (positive relationship)

Kuwa na mahusiano bora ni jambo la muhimu sana ili kuwa na furaha katika maisha. Hii inajumuisha mahusiano bora na familia yako, marafiki zako na jamii yako. Ili kuimarisha mahusiano hayo, tenga muda wa kuwa na familia yako, marafiki zako na jamii yako.

iii. Kujua kusudi la maisha yako (Your life Purpose) na kufanya vitu vinavyochangia kutimiza kusudi la maisha yako.

Kufanya jambo linaloendana na kusudi la maisha yako inachangia kufanya uwe na furaha. Inakupatia hamasa na hivyo kukuwezesha kutotoka nje ya malengo yako.

2. Maendeleo binafsi (Personal Growth)

Kigezo cha pili cha ndani cha kuangalia unapopima mafanikio ya kweli ni maendeleo binafsi (personal growth). Katika kuangalia maendeleo binafsi katika maisha inajumuisha
i. kuweka na kutimiza malengo (setting and achieving clear, measurable goals),
ii. kujifunza kutokana na na makosa ( learning from your mistakes) na
iii. Kujitambua (self-awareness and self-improvement).

i. Kuweka na kutimiza malengo (setting and achieving clear, measurable goals)

Ni jambo la muhimu sana kuweka malengo kwa sababu ndiyo yanayokupatia ramani ya maisha yako. Unapofahamu wapi unakwenda, Inakupatia hamasa ya kufanya kazi kwa bidii na bila kutoka nje ya ramani. Pia inakuwezesha kupima mafanikio kwa kila hatua ndogo unayopiga kuelekea kwenye kutimiza malengo yako makubwa ya maisha.

ii. Kujifunza kutokana na makosa (Learning from your mistakes)

Kujifunza kutokana na makosa ni sehemu nyingine ya muhimu sana kwenye maendeleo yako binafsi (Personal growth). Unapokuwa umefanya makosa, chukulia makosa hayo kuwa ni fursa kwako kwa ajili ya kujifunza, kupata uzoefu na kuboresha pale ambapo ulikuwa na udhaifu. Kwa kuangalia makosa uliyoyafanya, itakusaidia kutokurudia makosa hayo na hivyo kukuwezesha kufanikiwa kwenye kazi zako.

iii. Kujitambua (Self-awareness and self-improvement)

Hili ni jambo la msingi sana kwenye maendeleo yako (Personal growth). Maana ya kujitambua ni kufahamu ubora wako (your strengths) na madhaifu yako (your weaknesses) na kuchukua hatua ya kuboresha mapungufu yako ili uwe mtu bora zaidi na hivyo kuweza kutimiza malengo yako katika ubora wa hali ya juu.

3. Afya ya kimwili na kiakili (Mental And Physical Health)

Kuwa na afya bora kimwili na kiakili ni kigezo cha muhimu sana cha ndani kinachopima mafanikio yako. Hii inajumuisha kufanya kila kitu ambacho kipo ndani ya uwezo wako kuweza:
i. Kuboresha afya yako ya mwili.
ii. Kuhimili misongo (stress) na changamoto (challenges) za maisha.
iii. Kuweka uwiano mzuri wa kazi na maisha yako (good work -life balance).

i. Kuboresha afya yako ya mwili.

Hii inajumuisha kula mlo kamili (healthy diet), kufanya mazoezi na kupata usingizi wa kutosha. Unapokuwa na afya bora, mwili wako unakuwa na nguvu ya kuweza kutimiza malengo yako ya maisha na hivyo kuchangia kwenye mafanikio yako.

ii. Kuhimili misongo na changamoto (Coping with stress and challenges).

Hili ni jambo la muhimu sana kwenye afya yako ya mwili na akili. Maisha yamejaa milima na mabonde, hivyo ni muhimu kuweza Kuhimili changamoto na misongo inayojitokeza kwenye maisha yako.

iii. Kuweka uwiano mzuri wa kazi na maisha yako (good work -life balance)

Kuweka uwiano mzuri kati ya kazi zako na maisha yako mengine ni jambo la muhimu sana. Hii itakuwezesha kufanikiwa kwenye kazi zako wakati huohuo ukiwa na muda mzuri wa kufurahia na familia yako, marafiki zako na jamii yako kwa ujumla.

Vigezo vya nje (External Factors ) vya kupima mafanikio ya kweli.

Pamoja na vigezo vya ndani nikivyoelezea hapo juu, pia kuna vigezo vya nje vinavyotumika kupima mafanikio yako. Vigezo hivyo ni hivi vifuatavyo:

1. Utajiri au kuwa na uchumi imara (Financial Stability And Wealth)

Kigezo cha kwanza kabisa cha nje ni kuwa tajiri au kuwa na uchumi imara. Watu wenye pesa nyingi, nyumba nzuri au gari huwa wanaonekana kuwa wamefanikiwa. Watu hawa huwa wamefanya kazi kwa bidii kuweza kutimiza malengo yao. Hivyo, ili uweze kuwa na uhuru wa kifedha, ni lazima uzingatie mambo yafuatayo:
i. Kuepukana na madeni
ii. Kuweka akiba na kufanya uwekezaji wa muda mrefu.

i. Kuepukana na madeni.

Ili uweze kuepukana na madeni, ni sharti ujifunze kuweka bajeti. Kwa kufanya hivyo, utaweza kutumia kipato chako bila kuingia kwenye madeni na kubakiza kiasi cha pesa ambacho utaweka akiba, kuwekeza na kuwa na uchumi imara.

ii. Kuweka akiba na kufanya uwekezaji wa muda mrefu.

Kigezo hiki, kina uhusiano wa moja Kwa moja na kigezo cha kwanza. Kama utaweza kuishi chini ya kipato chako, utapata pesa ya ziada ambayo utaiwekeza kwenye biashara, kununua hisa, hati fungani na kadhalika. Unapoiwekeza pesa yako, itaongezeka na hivyo kufanya uwe na mafanikio kwenye maisha yako. Jambo la msingi hapa ni kuwekeza pesa yako mahali ambapo itaongezeka thamani.

2. Kufanikiwa kwenye kazi kipaji au taaluma Yako (Professional Accomplishments)

Kigezo kingine cha kupima mafanikio ya nje ni kufanikiwa kwenye taaluma, kipaji au kazi yako. Hii inajumuisha kufikia malengo uliyojiwekea. Kufanya mambo makubwa kwenye kazi yako ambayo yataleta mchango chanya kwenye eneo lako la kazi.

3. Kuwa na mchango kwenye jamii yako (Contribution To Society)

Kigezo cha mwisho kwenye kupima mafanikio yako ni kwa kuangalia ni mchango gani unaotoa kwenye jamii yako. Jamii yako lazima ihisi uwepo wako. Taaluma yako, kipaji chako au kazi yako ni lazima itatue matatizo yaliyopo kwenye jamii yako. Kwa kufanya hivyo, jamii itakupenda na kukuheshimu kwa sababu utakuwa unasaidia kutatua changamoto zinazoikabili.
Mafanikio ya kweli ni lazima yawe na uwiano wa vigezo vya ndani na vya nje.
Hivyo, ili uweze kuhitimisha kuwa na mafanikio ya kweli ni lazima kuwe na uwiano kati ya vigezo vya ndani na vya nje.

Swali la leo.

Katika maisha yako, unafikiri ni vigezo gani vya mafanikio haujavifikia na unatamani kuvifanyia kazi ili uweze kuwa na mafanikio ya kweli?

Ninatamani sana unishirikishe kwa kuandika hapa chini kwenye box la maoni.