Brian Tracy, mtaalamu wa masuala ya maendeleo binafsi (self development) aliwahi kusema kuwa, Unaweza kutimiza takriban lengo lolote ulilojiwekea, mradi tu lengo lako liwe wazi na uendelee kwa muda wa kutosha kulifanyia kazi. Kuzingatia mpango wako binafsi wa maendeleo huongeza sifa ulizo nazo ndani yako na hufanya ndoto na matarajio yako kugeuka kuwa ukweli. Uwezo wako hauna kikomo na kuwekeza katika maendeleo yako binafsi ni njia ya kutumia talanta zako nyingi. Katika makala hii nitakushirikisha jinsi ya kuweka mpango wa maendeleo ili uweze kufanikiwa katika maisha yako.
Umuhimu wa Kuwa na Malengo.
Kuweka malengo ya kile unachotaka kufikia na wapi ungependa kwenda kwa muda mfupi au mrefu kunaweza kuboresha maendeleo yako binafsi. Baada ya kusoma karibu kila kitu kilichoandikwa au kusemwa juu ya maendeleo ya binafsi na mafanikio, Brian Tracy alifikia hitimisho kwamba mzizi wa yote mawili ni kiwango chako cha kujiamini. Kujiamini ni jambo muhimu katika kila kitu unachotaka kukikamilisha katika maisha yako.
Watu wengi hawafaulu katika taaluma zao kwa sababu hawatambui maeneo ya maendeleo yao binafsi ambayo yanaweza kuwasaidia kufikia ustadi wa hali ya juu katika maisha yao. Hakuna mbadala wa kufanya kazi kwa bidii. Ikiwa utaweka lengo, weka mpangokazi na uufanyie kazi kila siku, utaona maendeleo ndani ya kazi yako.
Mipaka ipo Akilini Mwako.
Hakuna mipaka ya mafanikio isipokuwa mipaka unajiwekea wewe mwenyewe kwenye mawazo yako. Usichoke kujifunza maisha yako yote. Hata kama una mafanikio ya juu kwenye malengo yako, daima kuna kitu cha kujifunza.
Utakuwa mtu mwenye mafanikio yasiyopimika na utaona maisha yako yote yajayo yanafunguka mbele yako ikiwa unaishi maisha yenye malengo na yenye mwelekeo wa kukua. Kuwa na mpango hukusaidia kupata hali bora ya udhibiti wa maisha yako na kutakufanya uwe tayari kwa lolote litakalokuja.
Maana ya mpango wa maendeleo binafsi.
Unaweza kuwa unafikiria, mpango wa maendeleo binafsi ni nini? Mpango wa maendeleo binafsi ni mwongozo wa maisha yako na mafanikio yako ya baadaye.
Sababu ya kuwa na mpango wa maendeleo binafsi ni kwamba, kufanya mpango kutakusaidia kufanya maamuzi bora na kujikumbusha mahali unapotaka kwenda. Maandalizi mazuri huongeza uwezekano wa kufaulu na hupunguza hatari ya mambo kwenda kombo. Unapoandika mpango wako wa maendeleo ya binafsi, fikiria kuhusu malengo unayotaka kufikia, njia ambazo unahitajika kuziboresha na kuziendeleza, na hivyo kuwa na mpango ambao utakufanya uwe tayari kukabiliana na kazi muhimu zaidi kwa siku zinazokuja.
Hatua tanoMuhimu za Maendeleo Binafsi.
Katika Ukuaji binafsi, kabla ya kujiwekea mpango, unahitajika kutafakari kisha ufuate hatua hizi sita za msingi.
Hatua ya kwanza ni kuandika orodha ya malengo 10 muhimu zaidi ambayo ungependa kuyafikia.
Hatua ya pili ni kuandika ni yapi kati ya hayo malengo 10 ni muhimu zaidi kwako na kwa nini.
Hatua ya tatu ni kuandika ratiba maalum ya kufikia lengo lako.
Hatua ya nne, andika uwezo na udhaifu wako.
Kisha, zingatia kuandika uwezo wako katika maeneo matatu na mapungufu yako matatu na kisha uandike jinsi uwezo wako unavyoweza kukusaidia kufikia lengo hili na jinsi unavyopanga kushinda udhaifu huo. Hii itakusaidia kuweka mpango wa maendeleo binafsi katika vitendo na kutokukata tamaa unapopata changamoto.
Hii inaweza kuwa mambo unayohitajika kuongeza kwenye utaratibu wako wa kila siku pamoja na mambo unayohitaji kuondokana nayo.
Kwa kufanya hivi kutakusaidia kufikia kila lengo haraka.
Na hatimaye, hatua ya tano ni kutathmini maendeleo yako. Andika malengo yale ambayo yamekuwa yakifanya kazi vizuri, yale ambayo umekamilisha, yale ambayo bado unahitajika kuyaboresha, na ni ujuzi gani au maarifa gani umeyapata njiani.
Sasa, ningependa kusikia kutoka kwako. Swali letu la leo; ni nini kinakuzuia kufikia malengo yako? Je, ni ukosefu wa mpango? Acha maoni hapa chini nami nitahakikisha kuwa ninakutafuta ili tushauriane.
Ikiwa umefurahia makala hii na unahisi ilikuwa ni ya thamani sana kwako, usisite kuwashirikisha marafiki zako.
Kama una swali lolote usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.
Ili uweze kufanikiwa katika maisha, ni lazima ufahamu jinsi ya kuitumia siku yako vizuri. Kila mtu amepewa sawa siku yenye masaa 24. Tofauti ya watu wenye mafanikio na ambao hawajafanikiwa inatokana na jinsi wanavyotumia masaa ya siku. Unaopanza asubuhi siku yako vizuri, unafungua milango ya mafanikio. Hii ndiyo sababu waswahili wanasema kuwa, nyota njema huonekana asubuhi. Saa chache za kwanza za siku ni muhimu sana kuliko saa nyingine zozote za siku. Mmoja wa wanafikra wakuu alisema kwamba saa ya kwanza ni usukani wa siku. Katika makala ya hii nitakushirikisha ratiba za asubuhi za watu wenye mafanikio.
Umuhimu wa Saa za Asubuhi
Saa za asubuhi, unapamka tu, zinaweka mwelekeo wa siku yako yote, zikiathiri mawazo yako na uzalishaji wako katika masaa yote yanayofuata. Umuhimu wa saa hizi za asubuhi ndio sababu baadhi ya watu wenye mafanikio makubwa duniani huweka kwa umakini taratibu za asubuhi ambazo zinalenga kuwasaidia kuanza siku vizuri na kutumia masaa yanayofuata kwa ufanisi mkubwa.
Jinsi ya Kuanza Siku Vizuri.
1.Panga Siku Yako Usiku Mmoja Kabla.
Ikiwa ungependa kuanza kila siku kwa njia bora zaidi iwezekanavyo, zingatia kutekeleza baadhi ya taratibu hizi zilizothibitishwa za asubuhi kwenye ratiba yako ya asubuhi. Kwanza, panga siku yako usiku mmoja kabla. Kuandaa siku yako usiku mmoja kabla inaweza kuwa si sehemu ya taratibu za asubuhi, lakini ni njia nzuri ya kuanza siku yako vizuri.
Kwa kupanga kile unachotaka kukamilisha usiku kabla, unaweza kuanza kila siku ukiwa na mpango kichwani badala ya kuamka bila kujua unachotaka kufanya. Panga ratiba yako ya asubuhi pamoja na kile unachotaka kufanya. Kisha, amka asubuhi inayofuata na uweke mpango huo kwenye vitendo.
2.Weka Malengo ya Siku Kila Asubuhi
Pili, weka malengo ya siku kila asubuhi. Panga siku yako usiku kabla, lakini weka malengo yako asubuhi. Kwa mfano, unaweza kupanga kufanya kazi kwenye mradi siku nzima. Kisha, asubuhi weka lengo la ni kiasi gani cha mradi huo unataka kukamilisha. Hivyo ndivyo watu wenye mafanikio hufanya.
Kuweka malengo asubuhi ni mkakati mzuri kwa kuwa watu wengi huwa na nia ya kufanikiwa wanapoanza siku yao. Ikiwa utaweka malengo makubwa asubuhi, utahisi kulazimika zaidi na kujituma zaidi kuyatimiza kadri siku inavyoendelea.
3.Epuka Kuangalia Simu Yako au Vifaa Vingine vya Kielektroniki
Tatu, epuka kuangalia simu yako au barua pepe mara tu unapoamka. Hii ni kwa sababu inaweza kuleta usumbufu ambao unaweza kuingilia kati ratiba yako ya asubuhi. Pia unaweza kupata habari za kukatisha tamaa ambazo zinaweza kuua motisha yako wakati ambapo unahitaji kuichochea.
Subiri mpaka ratiba yako ya asubuhi itakapokamilika ndio uangalie simu yako. Julie Morgenstein, mtaalamu wa usimamizi wa muda, aliandika kitabu kinachoitwa Don’t Check Your Email in the Morning. Subiri mpaka saa 11:00 asubuhi na fanya kazi kwa masaa matatu mfululizo kabla ya kuangalia barua pepe zako, kisha fanya kazi tena kwa masaa matatu kabla ya kuziangalia tena, na ziangalie mara mbili au tatu tu kwa siku, na katikati ya wakati huo uzime na uache kuzitazama.
4.Fanya Mazoezi na Kunyosha Mwili Wako.
Nne, fanya mazoezi. Tafiti zimeonyesha kwamba watu wanaofanya mazoezi asubuhi wana uwezekano mkubwa wa kufuata ratiba ya mazoezi kuliko wale wanaofanya mazoezi mchana. Sababu ni kwamba unapamka asubuhi, unakuwa umepumzika na umejaa nishati. Mchana, baada ya siku ndefu ya kazi, unaweza kuwa hauna nishati au hamasa ya kufanya mazoezi.
Kunyoosha na kufanya mazoezi asubuhi pia kunakufanya damu yako izunguke na kukupa mlipuko wa nishati na adrenalin ambayo itakusaidia kuanza siku vizuri.
5.Soma
Tano, soma. Tafiti zinaonyesha kuwa watu wenye mafanikio, mamilionea waliojitengenezea mafanikio wote wanasoma kwa saa moja au zaidi kila asubuhi. Kama vile kufanya mazoezi asubuhi kunavyoufanya mwili wako kuwa tayari, kusoma asubuhi kunaifanya akili yako pia kuwa tayari.
Saa za asubuhi ni wakati mzuri wa kusoma kidogo kabla ya kwenda kazini. Ninapendelea kusoma kitu cha kielimu au cha kuhamasisha au cha kutia moyo ambacho kinanipa hamasa kidogo.
6.Tafakari
Sita, tafakari. Tafakari ni njia bora ya kusafisha akili yako, kuondoa msongo wa mawazo na kusaidia kuzingatia kazi iliyopo. Tumia dakika chache kukaa kimya na kuacha akili yako itulie. Si tu kwamba tafakari ya asubuhi itakusaidia kufurahia faida zote za kiafya zinazohusiana na tafakari, lakini pia itakuruhusu kuanza siku na mwelekeo mpya na safi.
7.Tumia Muda na Familia Yako
Saba, tumia muda na familia yako. Asubuhi inaweza isiwe na muda mwingi wa kutumia na familia yako kabla hawajaondoka, lakini unapaswa kutumia vyema muda unaoupata. Kaa chini na ule kifungua kinywa nao kama hiyo ni chaguo. Ikiwa si chaguo, angalau chukua muda kuzungumza nao kidogo kabla hamjaenda kila mmoja kwenye majukumu yake.
Hakika hakuna motisha bora kwa siku kuliko kutumia muda kidogo na wale unaowapenda zaidi. Zaidi ya yote, itakuwa motisha nzuri kwao pia wanapoanza siku yao.
Kabla sijahitimisha makala hii ya ratiba za asubuhi za watu wenye mafanikio, ningependa kukuachia wazo la kushiriki na marafiki zako. Akili yako ni kama misuli. Kadri unavyoitumia, ndivyo inavyokuwa na nguvu zaidi. Sasa, ningependa kusikia kutoka kwako, swali langu la leo ni, je, unafanya mambo sahihi asubuhi? Acha maoni hapa chini nami nitahakikisha ninakufuatilia.
Ikiwa umeifurahia makala hii na kuhisi ilikuwa ya thamani katika kukufundisha kuhusu taratibu za asubuhi za watu wenye mafanikio, washirikishe na marafiki zako. Pia kama una swali au maoni yoyote usisite kuandika hapa chini. Unaweza kuwasiliana nami kwa simu namba 0752 081669. Asante sana na karibu katika makala zinazofuata.
Tunaishi katika kipindi ambacho kuna fursa na uwezekano zaidi wa wewe kufikia malengo yako zaidi kuliko hapo awali. Kwa kweli, kuna mambo mengi mazuri ambayo unaweza kuyafanya Ili uweze kufanikiwa maishani mwako. Ikiwa wewe ni kama watu wengi leo, umekuwa ukilemewa na mambo mengi ya kufanya kutokana na muda kuwa mdogo sana, unapaswa kutumia muda wako vizuri ili uweze kutimiza malengo yako. Katika makala hii nitakushirikisha jinsi ya kuwa mtu wa vitendo ili uweze kutimiza malengo yako katika maisha.
Jinsi Ya Kuwa Mtu Wa Vitendo.
Kwanza, unahitaji kuchagua. Kuchagua ni muhimu ili kukuza tabia nzuri ya mafanikio. Uwezo wako wa kuchagua kazi yako ya muhimu zaidi kwa kila wakati, ili kuanza kazi hiyo, na kuifanya haraka na kwa ubora huleta mafanikio makubwa kuliko ujuzi mwingine wowote unaoweza kuukuza. Mtu wa kawaida mwenye mazoea ya kufanya kazi muhimu na kuikamilisha kwa haraka atakuwa na mafanikio makubwa kuliko mtu mwenye uwezo mkubwa na akili timamu ambaye anazungumza sana na kupanga mipango mizuri lakini haitekelezi.
Pili, unahitajika kuweka vipaumbele. Mafanikio yako katika maisha yataamuliwa na aina ya tabia ambazo unakuwa umezijenga kwenye maisha yako. Tabia ya kuweka vipaumbele na kuendelea na kazi yako muhimu zaidi ni ujuzi unaopaswa kuuweka kwenye vitendo na kuudumisha.
Kwa hiyo, unaweza kujifunza tabia hii kupitia mazoezi ya kurudia tena na tena hadi inapokuwa imekazwa kwenye akili yako na kuwa sehemu ya kudumu ya tabia yako. Mara tu inapokuwa tabia, inakuwa moja kwa moja na rahisi kufanya. Kupitia usimamizi wa muda, tabia ya kuanza na kukamilisha kazi muhimu ina malipo ya haraka na endelevu.
Umeundwa kiakili na kihisia kwa njia ambayo kukamilika kwa kazi hukupa hisia chanya. Inakufanya uwe na furaha. Inakufanya ujisikie mshindi.
Wakati wowote unapokamilisha kazi kubwa au yenye umuhimu, unahisi kuongezeka kwa nguvu, shauku, na kujistahi. Umuhimu zaidi wa kazi iliyokamilishwa, unakufanya ujihisi furaha, ujasiri zaidi, na nguvu ndani yako. Kukamilika kwa kazi muhimu huchochea kutolewa kwa endorphins kwenye ubongo wako.
Endorphins hizi hukupa kiwango cha juu cha nguvu za asili. Endorphin ambayo inafuatilia kukamilishwa kwa mafanikio kwenye kazi yoyote hukufanya ujisikie chanya zaidi, mwenye utu, mbunifu na mwenye kujiamini.
Kumbuka kuna mambo matatu muhimu unayopaswa kuyafanyia mazoezi ili uweze kuwa mtu wa vitendo na hivyo kufanikiwa kwenye malengo yako. Mambo hayo ni uamuzi, nidhamu, na dhamira.
Kwanza, lazima ufanye uamuzi wa kukuza tabia ya kuwa mtu anayezingatia vitendo.
Pili, kuwa na nidhamu binafsi ili kufanya mazoezi ya kanuni unazojifunza kwa kuzirudia tena na tena hadi iwe ni mazoea yako.
Na tatu, rudisha kila kitu unachofanya kwenye dhamira yako ili iwe ni tabia na kuwa sehemu ya kudumu ya utu wako.
Jione kuwa ni aina ya mtu ambaye anafanya kazi muhimu kwa haraka na kwa kupitia usimamizi mzuri wa wakati. Picha yako ya kiakili ina athari kubwa kwenye tabia yako. Jione kama mtu unayekusudia kuwa hivyo katika siku zijazo.
Taswira yako, jinsi unavyojiona kwa ndani, kwa kiasi kikubwa huamua utendaji wako wa nje. Uboreshaji wote katika maisha yako ya nje huanza na uboreshaji wa picha zako za akili ndani. Una uwezo usio na kikomo wa kujifunza na kukuza ujuzi mpya, tabia, na uwezo.
Unapojizoeza kupitia marudio na mazoezi ya kushinda kuchelewesha na kukamilisha kazi zako muhimu zaidi haraka, utasonga mbele kwenye njia ya haraka katika maisha na taaluma yako. Sasa ningependa kusikia kutoka kwako. Swali langu la leo ni, je, unajionaje? Acha maoni hapa chini na nitahakikisha kukufuata.
Nimatumaini yangu kuwa umepata maarifa ya kukusaidia kuwa mtu wa vitendo. Ikiwa umefurahia makala hii na unahisi kuwa imekuwa ni ya thamani kwako, usisite kuwashirikisha marafiki zako. Pia kama una swali lolote usisite kuandika hapa chini. Unaweza kuwasiliana nami kwa simu namba 0752 081669. Asante sana na karibu katika makala zinazofuata.
Linapokuja suala la masoko kwenye majukwaa mbalimbali ya mitandao ya kijamii, kila mtu huwa anataka kushiriki. Masoko kwenye mitandao ya kijamii, kwa juu juu, huwa inaonekana kama dhana rahisi. Ni kutengeneza tu akaunti zako kwenye Facebook na Twitter, kisha kupakia maudhui, umemaliza. Kuanzisha wasifu kwenye mitandao ya kijamii ni rahisi sana.
Kujenga chapa yako, ili uwe na ushawishi mpana katika sekta yako ni hadithi tofauti kabisa. Kuwa na uwepo mzuri ndani ya mitandao ya kijamii kunaweza kusaidia biashara yako kukua. Kwa bahati mbaya, hili linawezekana tu ikiwa unaweza kuwa na wafuasi wengi na kujifunza jinsi ya kuwapatia wanachotaka. Ikiwa unatumia mitandao ya kijamii kwa matumaini ya kukuza biashara yako, katika makala ya leo nitakushirikisha njia 5 za kukuza uwepo wako kwenye mitandao ya kijamii.
Njia 5 za Kukuza Uwepo Wako Kwenye Mitandao ya Kijamii.
1.Tafuta Fursa za Majadiliano
Unapojaribu kuongeza uwepo wako kwenye mitandao ya kijamii, lazima utafute fursa za kushirikisha hadhira yako katika mijadala inayofaa na yenye kuongeza thamani. Unahitajika kujiuliza maswali yafuatayo:
Ni mada gani moto kwa sasa katika sekta yako?
Je, kuna changamoto gani ambazo wateja wako wanazipitia? Uliza maswali yaliyo wazi ili wateja wako waweze kuchangia kwenye mjadala. Maswali yaliyo wazi huunda fursa bora kwako kushiriki katika mijadala na midahalo na wateja wako zaidi kuliko maswali ya kuchagua jibu sahihi. Faida ya ziada ni kwamba kila wakati chapisho lako linapopokea maoni, inaongeza uwezekano wa wao kuona chapisho lako linalofuata.
2.Tenga muda wa kuchati na wateja wako.
Kadiri kampuni yako inavyokuwa kubwa zaidi, ndivyo itakavyokuwa vigumu kuungana na wateja wako wote kwa kiwango cha mtu binafsi. Hata hivyo, kampuni ndogo zinaweza kutumia mwingiliano wa mtu binafsi walionao na hadhira yao kuongeza kuridhika kwa wateja wao.
Chagua mojawapo ya majukwaa ya mitandao ya kijamii na uunde tukio au hashtag ambayo itakupa fursa ya kuzungumza na wateja wako. Wakati wa tukio hilo, wape vidokezo vya kutatua matatizo na toa mapendekezo juu ya jinsi ya kuboresha uzoefu wao na huduma yako.
Pia waombe wakuulize maswali, na uhakikishe unawapa majibu makini na ya kina. Kuanzisha nyakati maalum za kuzungumza na wateja wako ni mkakati mzuri wa kuwa na mwingiliano na wateja wako kwa sababu unakuwa unawapa wateja wako nyakati maalum ambapo wanajua watakufikia.
3.Andaa mada zinazochochea mjadala.
Lengo zima la kuwa kwenye mitandao ya kijamii ni kuingiliana na wateja wako. Kwanza, unahitajika kutazama ni mitandao gani ya kijamii inayopata mwingiliano mwingi zaidi. Je, wateja wako wanawasiliana na wewe zaidi kupitia akaunti yako ya Facebook au Twitter (mtandao X)? Ikiwa unatumia Pinterest, unapata maoni mangapi kwenye bidhaa zako? Vipi kuhusu akaunti yako ya Instagram? Ni mitandao gani ya kijamii wateja wako wanajali zaidi?
Mara kwa mara angalia maudhui unayochapisha kwenye mitandao yako ya kijamii, ukizingatia hasa machapisho ambayo yamepata mwingiliano mwingi zaidi au mdogo zaidi kuliko kawaida. Ni mada zipi zinazovutia wateja wako na zipi zinazowafanya warudi kuzungumza na wateja wengine? Hivyo, jikite kwenye maudhui yanayochochea mjadala na mwingiliano kwa wateja wako.
4.Unganisha mada zako na makala za blog.
Kwa kiasi kikubwa, machapisho ya mitandao ya kijamii yanakusudiwa kuwa mafupi. Kila jukwaa lina kikomo cha maandishi, hivyo kuna kiwango kidogo cha habari unachoweza kushiriki kabla ya jukwaa kukujulisha kuwa umeishiwa nafasi ya kuandika. Lakini, hata hivyo, hata kama mtandao wa kijamii usingekuwa na ukomo wa idadi ya maneno, haupaswi kuandika maelezo mengi sana ambayo yatawachosha wateja wako. Hata hivyo, hii haimaanishi kuwa hauwezi kushiriki maudhui marefu zaidi kwenye mitandao mbalimbali ya kijamii.
Tumia mitandao ya kijamii kuongoza wageni wengi zaidi kwenye tovuti na blogi yako. Toa kichwa cha habari kinachovutia na sentensi moja au mbili kama kidokezo, pamoja na picha kutoka kwenye chapisho la blog inayovutia na kuleta umakini wa hadhira yako. Unaweza pia kuuliza swali ambalo litahitaji hadhira yako kutembelea tovuti yako ili kusoma chapisho kwa ujumla. Hii sio tu itavutia zaidi ushirikiano wa kina na profaili zako za mitandao ya kijamii, lakini pia itasaidia kuongeza idadi ya watembeleaji (trafiki) kwenye blogi yako. Pia usiogope kuweka bajeti kidogo kwa ajili ya kutangaza maudhui yako.
5.Tumia Picha Kwenye Mitandao yako ya Kijamii. Picha zinahusiana na mitandao ya kijamii kama vile samaki na maji. Imebainika kwamba, picha hupata ushiriki zaidi kuliko maandishi pekee. Kwa hiyo, ili kuanza kupata mafanikio makubwa ndani ya mitandao ya kijamii, ni muhimu kuanza kuweka picha zaidi kwenye akaunti zako za mitandao ya kijamii. Sasa, siyo picha yoyote itakayofanya kazi. Kuweka picha zako za kawaida hazitafanya kazi. Baadhi ya picha ambazo huwa zinafanikiwa zaidi ni pamoja na:
Picha za timu yako.
Picha za wateja wako.
Picha kutoka kwenye matukio yako.
Picha kutoka nyuma ya pazia.
Infografiki.
Picha zenye nukuu na kadhalika. Hakikisha kuwa picha zako zinabebwa na jina la tovuti yako au nembo ya kampuni ili hadhira yako iweze kuzifuatilia kirahisi.
Mitandao ya kijamii kwa sasa ni sehemu ambayo biashara na brand zinapaswa kuwepo. Kadri makampuni na mashirika zaidi yanapoanza kushiriki katika mitandao ya kijamii, ni muhimu kwako kuongeza juhudi yako na kuvutia zaidi kuliko washindani wako.
Mitandao ya kijamii inaipatia biashara yako jukwaa linalokuwezesha kuwasiliana na wateja wako na kuelewa mahitaji yao vizuri zaidi. Hii inakuwezesha kutoa huduma bora kwa wateja kwa kuwapatia wanachohitaji. Kuboresha uwepo wako ndani ya mitandao ya kijamii na ushiriki ni muhimu katika kujipatia mashabiki na wafuasi zaidi.
Kwa bahati mbaya, kuongeza uwepo wako kutahitaji kazi ngumu na ubunifu mwingi. Kwa kutekeleza njia hizi tano katika mkakati wako wa masoko kwenye mitandao ya kijamii, utaanza kupata umaarufu zaidi, kukuza ushawishi wako, na kujenga brand yako.
Haitatokea usiku mmoja, lakini kwa muda na kujitolea kwako, utaweza kutambuliwa ndani ya mitandao ya kijamii kwa biashara yako na kuvuna faida zote zinazotokana na hilo.
Nimatumaini yangu kuwa umepata maarifa ya kukusaidia kukuza uwepo wako ndani ya mitandao ya kijamii. Kama una maoni au swali usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.
Nguvu binafsi ni rasilimali muhimu sana katika kufanikisha malengo yako ya maisha na ya biashara yako. Ni uwezo wa kutumia nguvu zako za ndani, kujiamini, na kuwa na hamasa ili kufikia malengo yako. Kwa kutumia hatua hizi nne, unaweza kujenga nguvu hizi na kufanikisha mambo makubwa maishani mwako. Katika makala ya leo nitakushirikisha hatua nne za kukuza nguvu zako binafsi ili uweze kufanikisha malengo yako.
Hatua Nne Za Kukuza Nguvu Zako binafsi Ili Ufanikiwe.
Hatua ya Kwanza: Kujiamini
Kujiamini ni msingi muhimu wa kujenga nguvu zako binafsi. Imani kwako mwenyewe hukupa ujasiri na uthabiti wa kufuatilia ndoto zako. Ili kujenga kujiamini, anza kwa kutafakari juu ya mafanikio yako na makosa yako yaliyopita. Sherehekea mafanikio yako na jifunze kutokana na makosa yako. Jenga msingi huu mzuri wa kujiamini kisha chukua changamoto kubwa zaidi ambazo zinahitaji kujiamini zaidi.
Hatua ya Pili: Tambua Thamani Yako.
Thamani ni kanuni au viwango vya tabia ambavyo ni vya muhimu kwako. Thamani inaweza kutofautiana kutoka mtu mmoja hadi mwingine, lakini zinatoa mwelekeo wa kufanya maamuzi maishani. Ili kutambua thamani yako kuu, fikiria juu ya imani, sifa, nguvu, uwezo na uzoefu wa kufanya mambo ulionao. Tambua thamani yako na uitumie kama mwongozo wa kufanya maamuzi katika kutimiza malengo yako.
Hatua ya Tatu: Chukua Hatua kuelekea Malengo Yako.
Kufikia malengo yako inaweza kuwa ni kazi ngumu, lakini unapokuwa umefikia malengo yako inaleta furaha ya ajabu. Chukua hatua ndogo ndogo kuelekea malengo yako. Ni muhimu kuandika malengo yako na kupima maendeleo yako njiani ili kujipa motisha na nguvu. Ili uweze kuchukua hatua kuelekea malengo yako, unapaswa kuwa jasiri, makini na usiyekata tamaa.
Hatua ya Nne: Tengeneza Mtandao wa Msaada
Kuwa na mtandao wa msaada ni muhimu kwa mafanikio na furaha maishani kwa ujumla. Unaweza kupata watu wenye maslahi na malengo yanayofanana na ya kwako kwa njia mbalimbali kama vile: kujiunga na klabu au kuhudhuria matukio ya kijamii. Pia, unaweza kuungana na watu mtandaoni ambao wana malengo kama ya kwako ili muweze kubadilishana uzoefu na kupeana ushauri.
Kwa kufuata hatua hizi nne ambazo ni kujiamini, kutambua thamani yako, kuchukua hatua, na kuunda mtandao wa msaada, unaweza kukuza nguvu zako binafsi zaidi na kufanikisha malengo yako. Kwa nguvu hizi binafsi, chochote kinawezekana.
Sasa swali la leo ni: ni hatua gani kati ya hizi nne utaanza nayo leo? Acha maoni yako hapa chini, nami nitakufuatilia.
Ikiwa umeipenda makala hii na unaona ina thamani kwako, usisite kushiriki na marafiki zako. Kama una swali lolote usisite kuandika hapa chini. Pia unaweza kuwasiliana nami kwa simu namba 0752081669. Asante sana na karibu katika makala zinazofuata.
Katika enzi hii ya kisasa, teknolojia inabadilisha si tu maisha yetu ya kila siku bali pia inatoa fursa za ajabu za maendeleo binafsi na mafanikio ya kibiashara. Katika makala hii, nitajadili jinsi unavyoweza kutumia nguvu ya zana na majukwaa ya kiteknolojia katika kukuza maendeleo yako binafsi na kuinua biashara yako kufikia viwango vya juu.
Jinsi ya Kutumia Zana za Kiteknolojia kwa Maendeleo Binafsi na Mafanikio ya Biashara
1.Ufikiaji wa Taarifa na Kujifunza
Kwanza kabisa, teknolojia imepanua sana ufikiaji wa taarifa na kujifunza. Kozi za mtandaoni, wavuti, na majukwaa kama Teachable, Udemy, na LinkedIn Learning yanakuwezesha kujifunza ujuzi mpya au kuboresha ujuzi ulionao kutoka mahali popote duniani. Hii imebadilisha kabisa maendeleo binafsi, ikiruhusu kujifunza maisha yako yote na kuwa bora zaidi..
2.Mitandao ya Kijamii na Ujuzi binafsi
Athari nyingine ya teknolojia ni kuibuka kwa matumizi ya majukwaa ya mitandao ya kijamii. Majukwaa haya si tu kwa ajili ya kuwasiliana na marafiki na familia, bali ni zana zenye nguvu za kujenga brand binafsi, kuunganisha na watu wengine, na kujifunza. Kwa kuunganishwa na viongozi wa sekta mbalimbali, kujiunga na makundi ya kitaalamu, na kushiriki katika mijadala, unaweza kupata maarifa, na kuungana na watu wenye mawazo yanayofanana na yako ambao wanaweza kukuza ujuzi wako.
3.Data na Uchambuzi Wa Biashara
Kwa upande wa biashara, teknolojia inatoa utajiri wa data kupitia zana za uchambuzi. Majukwaa kama Google Analytics na Social Media Insights yanakupa uelewa wa kina wa hadhira yako, ikiruhusu mikakati iliyolengwa na maamuzi ya taarifa. Njia hii inayotegemea data inaweza kuboresha sana ushiriki wa wateja wako na hivyo kuchangia ukuaji wa biashara yako.
4.Kubadilika na kuwa wazi kwa mabadiliko
Athari nyingine ya kukumbatia teknolojia ni kwamba inamaanisha unakuwa na uwezo wa kubadilika na kuwa wazi kwa mabadiliko. Mazingira ya teknolojia yanabadilika kila mara na ndivyo unavyopaswa kuwa. Kwa kujifunza maisha yako yote na kuwa na hamu ya teknolojia mpya, unaweza kutarajia mabadiliko na kuyatumia kwa faida yako binafsi na kitaalamu.
Hii inatuleta kwenye hoja inayofuata kuhusu matumizi na jinsi AI ilivyobadilisha kabisa mfumo wa maisha. Akili bandia imeleta mapinduzi kwa kufanya kazi ambazo zingefanywa na watu lakini kwa haraka na kwa usahihi. AI zinadhibiti ratiba na kazi kwa ufanisi, wakati programu za usimamizi wa miradi zinazotumia AI zinatabiri muda wa kukamilisha miradi na kubaini masuala yanayoweza kutokea ili kusaidia kurahisisha kazi.
Kutumia AI kwa manufaa yako kutakupa uwezo wa kufanya kazi zako kwa haraka na kwa ubora na kuongeza uzalishaji kwenye kazi zako. Sasa, kama hutumii AI, hakika washindani wako wanaitumia, kwa hiyo unahitajika kuingia na kujitosa kikamilifu. Athari za teknolojia katika maisha yako na biashara yako zinaweza kuwa kubwa, lakini kwa kutumia zana na majukwaa ya kiteknolojia, unaweza kuboresha maendeleo yako binafsi, kuendesha biashara yako kwa mafanikio na kukabiri ugumu wa ulimwengu wa kisasa kwa kujiamini.
Swali langu la leo ni, teknolojia imeathilije maendeleo yako binafsi au biashara yako? Weka maoni yako hapa chini nami nitahakikisha ninakufuatilia. Asante kwa kufuatilia makala hii. Ikiwa umeifurahia makala hii na unaona imekuwa na thamani katika kukufundisha kuhusu athari za teknolojia, shiriki na marafiki zako au mtu yeyote ambaye anaweza kufaidika na maarifa hii. Asante sana na karibu kwenye makala zinazofuata.
Je, kungekuwa na tofauti gani katika maisha yako ikiwa ungekuwa na ujasiri usiotikisika katika uwezo wako wa kufanikiwa katika kila kitu ambacho unakiwaza kwenye akili yako? Msichana mmoja alimwandikia Brian Tracy akimwambia kwamba maisha yake yote yalikuwa yamebadilika kabisa tangu alipomsikia akiuliza swali, “Ni jambo gani kubwa ambalo ungethubutu kulifikiria na kulifanya ikiwa ungejua huwezi kushindwa?” Aliandika kwamba hadi wakati huo hili lilikuwa ni swali ambalo hakuwahi kulifikiria katika maisha yake. Baada ya kusikia swali hilo la Brian Tracy aligundua kuwa jambo kuu lililomtenganisha na matumaini na ndoto zake ni imani katika uwezo wake wa kuzifanikisha.
Wengi wetu tuko hivyo kwa sehemu kubwa ya maisha yetu. Kuna mambo mengi ambayo tunataka kuwa nayo na kuyafanya, lakini tunajizuia. Hatuna uhakika wa kufanikiwa kwa sababu hatuna ujasiri wa kutosha kutoka kwa imani katika mwelekeo wa ndoto zetu.
Hebu fikiria, ingekuwa na tofauti gani katika maisha yako ikiwa ungekuwa na imani isiyotikisika kabisa katika uwezo wako wa kufikia jambo lolote unaloliwaza akilini mwako? Je, ungetaka, kutamani na kutumaini nini? Ungethubutu kuota nini ikiwa unajiamini kwa imani kubwa kiasi kwamba huna hofu ya kushindwa hata kidogo? Jambo kuu ni kuwa mwaminifu kwako mwenyewe, kuwa mwaminifu kwa yaliyo bora zaidi yaliyo ndani yako, na kuishi maisha yako kulingana na maadili na matarajio yako ya juu. Chukua muda kufikiria wewe ni nani na unaamini nini na ni nini muhimu kwako.
Kuwa na ujasiri wa kujikubali jinsi ulivyo, si vile unavyoweza kuwa au jinsi mtu mwingine anavyofikiri unapaswa kuwa. Zingatia kuwa, wewe ni mtu wa thamani sana. Kuwa mwaminifu kwako mwenyewe inamaanisha kujua kile unachotaka na kuwa na mpango wa kukifanikisha. Kujiamini kunakodumu kunatokana na kujua kabisa kwamba unao uwezo wa kutoka hapo ulipo kwenda popote unapotaka kwenda.
Uko nyuma ya gurudumu la maisha yako. Wewe ndiye mbunifu wa hatima yako na bwana wa hatima yako. Tenda kana kwamba haiwezekani kushindwa.
Fanya kana kwamba tayari una kiwango cha juu cha ujasiri na endelea kujiuliza, ni jambo gani kubwa ambalo ningethubutu kulifikiria na kulifanya nikijua siwezi kushindwa? Chochote unachokiwaza kwenye jibu lako, unaweza kukipata ikiwa unajiamini kutoka na kukipokea. Hapa kuna hatua tatu unazoweza kuchukua mara moja ili Kujenga Kujiamini Kusikotetereka.
Kwanza, amua kuchukua hatua kwa imani katika mwelekeo wa ndoto zako. Fanya tu, usiwaze kushindwa.
Pili, jiulize, “ni kitu gani kikubwa ambacho ningethubutu kukiota na kukifanya nikijua siwezi kushindwa?”
Tatu, kuwa mwaminifu kwako mwenyewe, na uanze kuchukua hatua. Usiweke visingizio vingi vya kushindwa.
Nimatumaini yangu kuwa umepata maarifa ya jinsi ya kujenga ujasiri usiotetereka ili uweze kufikia mafanikio yako. Ikiwa umefurahia makala hii na unahisi kuwa ilikuwa ya thamani kwako, usisite kuwashirikisha marafiki zako. Kama una swali au maoni usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.
Katika maisha, kujitazama nyuma na kutafakari mafanikio uliyoyapata ni jambo muhimu sana. Pia ni vyema kuzingatia changamoto ulizokutana nazo na jinsi zilivyokusaidia kukua. Kitendo cha kufikiria uzoefu wako wa zamani, mafanikio, na mafunzo uliyoyapata, kutaweza kuamua malengo unayotarajia kufikia siku za usoni. Iwe umeweka malengo ya juu zaidi au umelenga kubaki thabiti na malengo yako, unatakiwa kuepuka mambo na tabia fulani ili uweze kufanikiwa. Katika makala hii nitakushirikisha mambo 10 ya kuacha ili ufanikiwe siku za usoni:
Mambo 10 Ya Kuacha Ili Ufanikiwe Siku Za Usoni.
1. Visingizio: Jifunze kuwajibika. Kuwa na malengo na ujikite kufanyia kazi malengo yako bila kuwa na visingizio. Kila kisingizio kinakurudisha nyuma kufikia lengo lako.
2. Kufanya mambo mengi kwa wakati mmoja: Ingawa inaweza kuonekana kuwa kama suluhisho la ufanisi, kufanya mambo mengi kwa wakati mmoja kunaweza kuharibu malengo yako. Fikiria kufanya kazi moja kwa wakati mmoja.
3.Kusema ndiyo kwa mambo yasiyosaidia malengo yako: Mara nyingine tunajisikia lazima tuseme ndiyo. Lakini kusema ndiyo kwa mambo ambayo hayasaidii malengo yako kunaweza kukurudisha nyuma. Jifunze kusema hapana kwa mambo yasiyo na maana ambayo hayachangii kwenye mafanikio yako.
4. Epuka watu wenye sumu: Kuna wakati utakutana na watu wasio na nia njema na mafanikio yako. Ikiwa hawakusaidii kufikia malengo yako, waache. Kuacha uhusiano na watu wenye mawazo hasi kunaweza kuwa kugumu, lakini kutakusaidia kufanikiwa baadaye.
5. Muda wa kutumia kwenye mitandao ya kijamii: Kwa wastani, mtu hutumia dakika 145 kwa siku, zaidi ya masaa 2 kwenye mitandao ya kijamii. Kudhibiti muda wako kwenye mitandao ya kijamii kunaweza kukuepushia kupoteza muda na badala yake kufanya vitu vingine vyenye tija.
6.Kutothamini kile ulichonacho sasa: Thamini vitu ulivyonavyo sasa. Kudharau vitu ulivyonavyo kunaweza kuzuia kufikia malengo yako. Kuwa na shukrani kwa kila unachokuwa nacho katika maisha yako. Kujifunza kushukuru imegundulika kuwa kunaimarisha mtazamo chanya na afya ya akili kwa ujumla. Hata kama kuna nyakati ambazo hauna furaha, unapothamini mafanikio yako unaongeza motisha ya kupiga hatua zaidi kuelekea kwenye mafanikio yako. Hivyo, unapaswa kuacha tabia hii ili uweze kufanikiwa.
7.Kutafuta idhini kutoka kwa watu wengine. Ikiwa unangoja mtu akuruhusu kufanikiwa, utangoja milele. Usisubiri mtu akwambie unaweza kufanya nini. Badala yake, onyesha uwezo wako. Jitwike jukumu la maisha yako na malengo yako wewe mwenyewe. Jiruhusu kufanikiwa.
8. Uvivu. Kama vile kutoa visingizio, kuchelewesha kazi pia kunazuia kufikia malengo yetu. Badala ya kusubiri kufanya kazi yako hadi dakika ya mwisho, au kuendelea kuahirisha, jichukulie kuwajibika na kufanya kazi kwa bidii.Tunaona mafanikio tunapochukua hatua na kufanya jambo.
9.Kuamini malengo yako ni makubwa au madogo sana. Malengo yako ni tofauti kabisa na ya mtu mwingine, hivyo unapaswa kuacha kulinganisha malengo. Badala yake, jikite katika jinsi unavyoweza kufikia malengo yako. Usipoteze muda kwa kufikiria sana au kuchambua mambo kama vile ukubwa au udongo wa malengo yako. Anza tu kuyatimiza.
10. Kulinganisha maisha yako na ya wengine. Kama vile malengo yanavyotofautiana na ya mtu mwingine, maisha yako pia ni tofauti kabisa na ya mtu mwingine.
Rais Theodore Roosevelt aliwahi kusema, Kujilinganisha na wengine ni mwizi wa furaha. Tunapojilinganisha na wengine, tunajihisi duni na tusiofaa. Tunapogundua kuwa tunaweza vya kutosha na tuna njia za kufikia malengo yetu, hatutajisikia vibaya kuhusu safari yetu ya mafanikio. Tutagundua kuwa kujilinganisha na wengine kunatuzuia tu kufikia safari yetu.
Nimatumaini yangu kuwa umepata maarifa kuhusu mambo 10 ya kuacha ili ufanikiwe siku za usoni. Kama una swali au maoni usisite kuandika hapa chini. Pia unaweza kuwasiliana nami kwa simu namba 0752081669. Asante sana na karibu katika makala zinazofuata.
Ni rahisi sana kuanzisha biashara mtandaoni. Lakini, ikiwa hutafuata njia sahihi hutaweza kamwe kufanikiwa. Watu wengi wanaoanzisha biashara mtandaoni hukata tamaa na kuachana nazo baada ya muda mfupi sana. Mimi sitaki wewe uwe miongoni mwao. Katika makala hii nitakushirikisha makosa 7 ya kuepuka ili uweze kuwa na biashara yenye mafanikio mtandaoni. Unapoepuka makosa haya utakuwa na nafasi kubwa zaidi ya kufanya biashara yako mtandaoni kwa mafanikio makubwa.
Makosa 7 Ya Kuepuka Ili Kuwa Na Biashara Yenye Mafanikio Mtandaoni.
1.Kutoichukulia Biashara Yako Mtandaoni Kama Biashara Halisi. Watu wengi wanaoanzisha biashara mtandaoni hufanya hivyo kwa kujaribu. Wamesikia madai mengi kuhusu jinsi watu wanavyoweza kupata utajiri kwa urahisi mtandaoni. Ni kweli, gharama ni ndogo sana kuanzisha biashara mtandaoni. Unahitaji tu kuwa na blog yako ambapo gharama yake ni ndogo sana.
Kutokana na gharama kuwa ndogo, watu wengi hutamani kuanzisha biashara mtandaoni. Lakini baada ya kugundua kuwa siyo kazi rahisi kama walivyokuwa wanafikiria, hukata tamaa na kuachana na biashara ya mtandaoni.
Ikiwa hutaichukulia biashara yako ya mtandaoni kama biashara halisi basi uwezekano wa kushindwa ni mkubwa zaidi. Ni kweli huna haja ya kuwekeza pesa nyingi lakini unahitajika kuwekeza hisia, nguvu na akili yako yote katika biashara yako ya mtandaoni kama zilivyo biashara zingine.
Kujenga biashara mtandaoni yenye mafanikio kunahitaji kufanya kazi kila siku. Unahitajika kujifunza kufanya mambo sahihi na kutangaza biashara yako mtandaoni wakati wote.
Ikiwa biashara yako ya mtandaoni utaichukulia tu kama hobi, basi nafasi zako za mafanikio zitapungua sana. Hili ni kosa kubwa miongoni mwa makosa ambayo watu wengi huwa wanafanya.
Fikiria kwamba umewekeza akiba yako yote katika duka lako la mjini au mtaani kwako. Je, ungeichukulia biashara yako kama tu ni hobi? Hapana usingefanya hivyo. Kwa hiyo, fikiria kwamba umewekeza akiba yako yote ya maisha katika biashara yako mtandaoni. Kutakuwa na siku ambapo mambo yataenda mrama na biashara yako ya mtandaoni haitaenda kama ulivyokusudia. Unahitaji ustahimilivu na kujitolea kukabili matatizo haya na kusonga mbele na hivyo kujenga biashara yenye mafanikio mtandaoni. Kuchukulia biashara yako ya mtandaoni kama biashara halisi kutakusaidia kupata mafanikio.
2.Kutokuwa na mpango. Hivi unafikiri ni watu wangapi wanaoanzisha biashara mtandaoni wanaweka mpango kwa ajili ya biashara zao? Jibu ni wachache sana. Hakuna anayejua ni biashara ngapi mtandaoni zinashindwa kila mwaka, lakini ni nyingi. Wamiliki wengi wa biashara mpya mtandaoni hawaweki malengo au kuwa na mpango. Kisha wanashangaa biashara zao zinaposhindwa kabisa.
Ikiwa unaanzisha biashara mtandaoni, weka lengo. Lengo rahisi la kuweka ni lile la kifedha. Fikiria kiasi gani unataka biashara yako ya mtandaoni ikuzalishie katika miezi 12 ya kwanza na kisha geuza kuwa lengo lako la kifedha.
Biashara yako ya mtandaoni ina uwezo wa kukuingizia pesa nyingi. Kizuizi pekee ni wewe. Tumia mchakato wa kuweka malengo wa SMART kuweka malengo yako. SMART ni ufupisho wa maneno kadhaa kama ifuatavyo:
Specific– lengo lako lazima liwe maalum, kwa mfano, biashara yangu ya mtandaoni itazalisha sh 1,000,000 mwaka ujao.
Measurable – lazima uweze kupima jinsi unavyosonga mbele kuelekea lengo lako. Bahati nzuri, kuna zana nyingi za kupima mafanikio ya biashara yako mtandaoni.
Achievable– Lengo lako lazima liwe linalofikika. Ni vigumu sana kuingiza dola milioni katika mwaka wako wa kwanza. Hivyo weka lengo unaloweza kulifikia.
Realistic– fikiria muda ulionao na rasilimali nyingine kama vile pesa.
Timed– lazima uweke muda kwa lengo lako, kama vile mwaka mmoja. Malengo yasiyo na kikomo hayana maana. Baada ya kuweka lengo lako, unahitajika kuweka mpangokazi wa kufikia lengo lako. Unatakiwa kuwa na orodha ya kazi za kila siku ambazo utazifanya ili kusonga mbele kutimiza lengo lako. Kwa hiyo fikiria kuhusu majukumu makubwa ya mpangokazi wako na kisha uyavunje kuwa majukumu madogomadogo ya kila siku. Kwa kufanya hivyo utakuwa umeepuka makosa ambayo watu wengi hufanya na hivyo kuwafanya wakate tamaa kwenye biashara ya mtandaoni.
Mpangokazi rahisi unaweza kuwa:
Chagua mada (niche) na aina ya biashara yako ya mtandaoni.
Kutengeneza blog.
Kuweka maudhui.
Unaweza kuanza leo kwa kuchagua niche unayotaka kuingia.
3. Kutokuchagua Niche Sahihi.
Kuchagua niche sahihi ni muhimu sana katika kuanzisha biashara yenye mafanikio mtandaoni. Usifanye makosa katika hili. Ikiwa utakosea, unaweza kutumia muda mwingi, jitihada, na pesa bila kupata mafanikio makubwa. Kuna maelfu ya niche, lakini sio zote zinafaa kwa biashara mtandaoni.
Kwa nia njema, ikiwa utaanza biashara mtandaoni katika niche unayoipenda, utakuwa na motisha zaidi kufanya kazi kwa bidii na hivyo kupata mafanikio makubwa kwa haraka.
Hata hivyo, jambo hili linaweza kuwa na matokeo mazuri ikiwa niche unayoipenda ina uwezo wa kukuingizia pesa nyingi. Labda unapenda kushona nguo za kawaida, lakini je, kuna watu wengi watakaonunua nguo hizo?
Kuna mambo mawili unayopaswa kuzingatia unapochagua niche:
Je, kuna mahitaji? Tafuta kujua kama kuna watu wanaotafuta bidhaa au huduma katika niche hiyo. Unaweza kutumia Google kujua idadi ya utafutaji wa maneno muhimu katika niche unayotaka kuanzisha biashara mtandaoni. Kadri idadi ya utafutaji inavyokuwa kubwa, ndiyo kiashiria kuwa niche yako ni maarufu na inahitajika.
Je, kuna pesa katika niche hiyo? Fanya utafiti kwenye Google kwa kutumia maneno muhimu ya niche yako. Je, kuna matangazo mengi kwenye ukurasa wa kwanza wa matokeo ya utafutaji? Ikiwa ni ndiyo, hii inaonyesha kuwa kuna fursa ya kupata pesa. Ikiwa bado una shaka kuhusu kuchagua niche sahihi, chagua ile unayohisi itakuwezesha kupata pesa. Usijali kama sio mtaalamu wa niche hiyo sasa. Unaweza kujifunza na kuwa bingwa baadaye. Ni bora kufanya hivyo kuliko kuchagua niche isiyo sahihi ambayo unaijua vizuri lakini haiwezi kukupatia kipato.
4.Kutokuchagua mfumo sahihi wa biashara mtandaoni:
Kuna mifumo kadhaa ya biashara mtandaoni ambayo unaweza kuchagua. Baadhi ya mifumo hii ni:
Uuzaji wa Washirika (Affiliate marketing): Hapa unatangaza bidhaa za makampuni mbalimbali kwa lengo la kupata gawio baada ya kupata wateja na kufanya mauzo.
Kuuza bidhaa na huduma zako mwenyewe: Hapa unakuwa ukiuza bidhaa au huduma zako.
Duka lako la e-commerce: Kuanzisha duka lako la mtandaoni na kuuza bidhaa.
Je, una ujuzi maalum unaohitajika? Baadhi ya huduma za kujitegemea zinazohitajika sana ni:
Kuandika makala.
Ubunifu wa picha (kama vile nembo) na kadhalika.
kutengeneze Programu za simu na computer.
kutengeneza blog na wavuti (websites)
Kutafuta masoko kwenye mitandao ya kijamii na kadhalika.
Ikiwa una ujuzi wa aina hizi, unaweza kuanzisha biashara yenye mafanikio mtandaoni kwa kuuza huduma zako na kupata pesa mtandaoni. Kumbuka kuwa utahitajika kuwa na nidhamu ili kutoa kazi bora kwa wateja wako kwa wakati unaostahili.
Mifano yote hii ya biashara mtandaoni ina uwezo wa kukuingizia pesa nyingi. Chagua ile inayokufaa na endelea nayo. Kumbuka kujifunza kuhusu mifumo hii. Usibadilishebadilishe biashara mtandaoni, kwani hautapata matokeo unayoyategemea.
5. Ugonjwa Wa Vitu Vinavyong’aa (Shiny Object Syndrome). Mara nyingi utasikia msemo “nyasi ni za kijani zaidi huko.” Hii inamaanisha kuwa kuna fursa bora za mafanikio ya biashara mtandaoni mahali pengine kuliko hapa. Tunaiita ” Shiny Object Syndrome – ugonjwa wa vitu vinavyong’aa.”
Unapochagua aina ya biashara mtandaoni, kutakuwa na watu wanaokwambia kuwa umefanya uchaguzi mbaya na unapaswa kubadili biashara yako na kununua mafunzo yao ili ujifunze jinsi ya kupata utajiri kutoka kwao.
Watu wengi wanaochagua niche wanakabiliwa mara kwa mara na vitu vinavyong’aa vipya vinavyowadanganya. Kuna kozi na programu mpya zinazotolewa kila siku ambazo zote zitakuambia kuwa unahitaji kuacha unachofanya sasa na kufuata mwelekeo wao.
Simaanishi kuwa usiwekeze katika mafunzo zaidi kwenye biashara uliyoichagua. Unapaswa kujifunza kila kitu unachoweza kuhusu biashara yako na kuwa tayari kujaribu njia mpya ili kufanikiwa. Lakini unachopaswa kuepuka ni kubadili mwelekeo kabisa kwa sababu nyasi zinaonekana kijani zaidi upande mwingine.
6. Kutokupata watembeleaji wa kutosha.
Ikiwa ungeulizwa kwa nini biashara nyingi mtandaoni zinashindwa, sababu kuu ingekuwa nini kwa maoni yako? Je, ni ukosefu wa maslahi? Ukosefu wa rasilimali? Kutokuwa na muunganisho bora wa intaneti? Kwa maoni yangu, jibu halitakuwa lolote kati ya haya. Jibu ni: Kutokupata watembeleaji wa kutosha!
Ikiwa hutapata watembeleaji walengwa kwenye ofa zako basi hutaweza kupata pesa mtandaoni. Unaweza kuwa unapromoti ofa ya kawaida na bado ukapata pesa nzuri kutokana nayo ikiwa utavutia wageni wa kutosha kwenye ofa hiyo.
Kwa upande mwingine, unaweza kuwa na ofa bora zaidi duniani, lakini ikiwa hautavutia watembeleaji walengwa wa kutosha basi hutafanya mauzo mengi. Watembeleaji ni sehemu muhimu zaidi ya biashara yenye mafanikio yoyote mtandaoni bila kujali aina ya biashara mtandaoni uliyoichagua.
Ikiwa wewe umejiajiri mtandaoni na hakuna mtu anayejua kuhusu huduma zako, basi biashara yako mtandaoni itashindwa. Kama mfanyabiashara mshirika (affiliate ) ikiwa hautavutia wageni wa kutosha kwenye ofa unazopromoti basi hutapata kamisheni yoyote. Bila watembeleaji walengwa kwenye duka lako la biashara mtandaoni hutauza chochote – na hivyo ndivyo inavyokuwa.
Mara tu unapoweka biashara yako mtandaoni unahitajika kutumia muda mwingi kuitangaza. Kuna njia kadhaa unazoweza kufanya hivyo. Ikiwa hutaki kutumia pesa unaweza kuitangaza biashara yako kwa kushea kwenye mitandao ya kijamii na kadhalika.
Ikiwa una pesa kidogo za kuwekeza basi unaweza kutumia matangazo ya kulipia kuitangaza biashara yako mtandaoni. Unaweza kununua wageni wa kulipia matangazo ya Google (Google ads) au matangazo ya facebook (facebook ads). Ninapendekeza ufanye mchanganyiko wa matangazo ya bure na matangazo ya kulipia.
Hakuna kitu muhimu zaidi kuliko kutafuta watembeleaji kwenye biashara yako ya mtandaoni. Hakuna watembeleaji inamaanisha hakuna biashara. Kwa hiyo fanya kila jitihada kuitangaza biashara yako mtandaoni wakati wote. Wageni wengi zaidi unapopata ndivyo unavyoweza kuwa na biashara yenye mafanikio na hivyo kupata pesa zaidi.
7.Kutokupima na kutathimini maendeleo ya biashara yako ya mtandaoni.
Moja ya faida kubwa ambayo biashara ya mtandaoni inayo ikilinganishwa na biashara ya kawaida ni kwamba unaweza kupima karibu kila kitu kwa wakati halisi. Lakini wamiliki wengi wa biashara mtandaoni hupuuza hili au hawalizingatiii vya kutosha.
Ikiwa unataka kujua ni wageni wangapi walitembelea tovuti yako wiki iliyopita unaweza kutumia programu kama Google Analytics kukujulisha hili. Pia unaweza kujua wageni wako walitoka wapi na ni kurasa zipi za tovuti yako walizotembelea.
Ni muhimu pia kujua walikaa muda gani kwenye tovuti yako. Watembeleaji wako wanapaswa kukaa kwa muda mrefu iwezekanavyo. Ikiwa wanaondoka haraka basi unahitajika kuchunguza kwa nini na kurekebisha tatizo hili.
Huwezi kusimamia kile usichoweza kupima. Na pia kwenye biashara ya mtandaoni unaweza kupima vitu vingi kwa hiyo tumia fursa hii. Itakuambia ni kampeni zipi zinazofanya kazi na pia itaangazia maeneo ya tovuti yako ambayo unahitajika kuyafanyia maboresho. Taarifa hii ni ya thamani kwa hiyo hakikisha unaitumia.
Nimatumaini yangu kuwa umenufaika kiasi cha kutosha na makala hii ya Makosa 7 Ya Kuepuka Ili Kuwa Na Biashara Yenye Mafanikio Mtandaoni. Nimeelezea kwa undani makosa 7 ambayo wamiliki wapya wa biashara mtandaoni hufanya ambayo yanawazuia kuwa na mafanikio. Sasa kwa kuwa unafahamu makosa haya unahitajika kujizatiti ili uweze kuyaepuka na hivyo kukuza biashara yako.
Kama una swali lolote kuhusiana na jinsi ya kuanzisha biashara yenye mafanikio mtandaoni usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazofuata.
Kuna dhana iliyojengeka miongoni mwa watu wengi kuwa mamilionea wanaishi maisha ya anasa. Wanasafiri kwa ndege binafsi, wanaendesha magari ya kifahari, wanavaa nguo za mitindo mipya kila wakati na pia wanaishi katika nyumba za gharama kubwa. Ukweli ni tofauti kabisa. Thomas J. Stanley na William D. Danko wanadai kugundua siri kubwa zaidi ya mamilionea halisi wa Marekani. Katika kitabu chao cha ‘The Millionaire Next Door’, wanafichua ugunduzi wao kuhusu mtindo rahisi wa maisha ya mamilionea wa Marekani. Mtindo ambao hata wewe ukiweza kuishi utaweza kutengeneza utajiri.
Kitabu cha ‘The Millionaire Next Door’ kina msingi mmoja mkuu: hata wewe pia unaweza kuwa na mafanikio ya kifedha ikiwa utaepuka kutumia zaidi ya unavyopata, kujitoa kikamilifu katika kuwekeza, na kupanga mipango ya fedha zako vizuri.
Kuhusu Thomas J. Stanley na William D. Danko.
Thomas J. Stanley (1944-2015) alikuwa ni Mmarekani mwandishi na mfanyabiashara. Aliandika na kushiriki kuandika vitabu kadhaa kuhusu tabaka tajiri la Marekani. Orodha hiyo inajumuisha kitabu kilichouza sana cha The Millionaire Next Door, ambacho alikiandika kwa kushirikiana na William D. Danko.
Stanley alipata shahada ya uzamivu katika utawala wa biashara kutoka Chuo Kikuu cha Georgia. Baada ya kuhitimu, alihudumu katika nafasi mbalimbali za uongozi katika makampuni mbalimbali. Pia alikuwa mshauri mkuu katika Kampuni ya Datapoint iliyoanzishwa mwaka 1968. Datapoint ilikuwa kampuni ya teknolojia iliyokuwa ikitengeneza terminali za kompyuta. Baadaye katika kazi yake, alitoa mihadhara ya masoko katika vyuo vikuu vya Tennessee na Georgia.
Dkt. William D. Danko ni mwanachama wa kitivo katika Chuo Kikuu cha Jimbo la New York (State University of New York). Katika miongo mitatu iliyopita, amesoma tabia ya watumiaji na jinsi ya kutengeneza utajiri kwa kina (consumer behavior and wealth formation). Mbali na The Millionaire Next Door, pia ameshiriki kuandika kitabu cha Richer Than a Millionaire: A Pway to True Prosperity. Dkt. Danko ni mtafiti aliyechapishwa nchini Marekani, Australia, Canada, Ujerumani, Poland, na Uswisi. Alimaliza Ph.D. yake katika chuo cha Rensselaer Polytechnic Institute’s (RPI) Lally School of Management.
Stanley na Danko walitumia miaka 20 kusoma jinsi Wamarekani waliofanikiwa walivyopata utajiri na jinsi wanavyotumia pesa zao. Walishirikisha takriban watu 1,000, ambao walijibu maswali 200 kila mmoja. Waandishi wengi hutumia muda mwingi kusoma na kuandika jinsi ya kupata utajiri. Lakini Stanley na Danko walilenga kuelewa jinsi matajiri wanavyoishi maisha yao tofauti na Wamarekani wa kawaida. Stanley alifariki katika ajali ya gari mwaka 2015.
Karibu sasa tuangalie kanuni za kutengeneza utajiri kutoka kwenye kitabu hiki cha The Millionaire Next Door.
Kanuni 9 Za Kutengeneza Utajiri : Kitabu Cha The Millionaire Next Door.
1: Mamilionea Hawatumii Kiasi Kikubwa cha Pesa Wanachopata. Kama milionea, unaweza kuwa umewaza kuendesha gari la kisasa na kunywa mvinyo wa bei kubwa. Lakini kwa uhalisia, mamilionea wengi ni waangalifu katika matumizi.
“Watu wengi wanaoishi katika nyumba za gharama kubwa na kuendesha magari ya anasa, kiuhalisia hawana utajiri mkubwa. Tuligundua kitu cha ajabu zaidi kwenye utafiti wetu: Watu wengi wenye utajiri mkubwa hawaishi hata katika maeneo ya kifahari.” – Thomas J. Stanley
Hii sio dhana ambayo utaisikia kwenye vyombo vya habari kuhusu mamilionea. Badala yake, vyombo vya habari vinaonyesha maudhui yanayosifu matumizi makubwa ya pesa na maisha ya kifahari.
“Sekta ya matangazo na Hollywood wamefanya kazi nzuri ya kutufanya tuamini kwamba utajiri na matumizi makubwa ya pesa vinakwenda sambamba.” – Thomas J. Stanley
Lakini, ikiiwa unataka kufikia mafanikio ya kifedha na kutengeneza utajiri, usifuatilie maisha yasiyokuwa na uhalisia kutoka kwenye vyombo vya habari. Lazima upange matumizi yako na ujifunze jinsi ya kuokoa pesa unapoanza kupata pesa zaidi ya zile unazozihitaji.
“Kwa kipato chochote ulichonacho, ishi chini ya kipato chako. Mamilionea mara nyingi hutengeneza utajiri kwa kutotumia mali nyingi kwenye makazi yao ya kwanza, hivyo kuwafanya wawe na uwezekano mdogo wa kuishi katika maeneo tajiri” – Thomas J. Stanley
Ili uweze kuwa millions siyo lazima uwe msomi au mtaalamu wa teknolojia. Mara nyingi mamilionea ni watu wanaoishi maisha ya kawaida kabisa jirani yako. Wanatumia kila dola kununua bidhaa zinazoongeza thamani katika maisha yao. Mamilionea pia sio lazima wamiliki magari ghali zaidi. Badala yake, wanaweza hata kumiliki magari ya kawaida ya mkono wa pili (second hand).
Jinsi Mamilionea Wanavyoishi Maisha Yao Kwa Uangalifu. Bajeti madhubuti na kuishi maisha ya uangalifu ni muhimu sana katika kujenga utajiri wako. Kupata mshahara mkubwa haimaanishi kuwa wakati wewe ni tajiri. Hata kama wewe ni miongoni mwa wafanyakazi wanaolipwa vizuri zaidi, kodi itachukua sehemu kubwa ya kipato chako. Baada ya kupunguza gharama za maisha, utakuwa umebakiwa na pesa kidogo za kujikimu hadi mshahara ujao.
Lakini huna haja ya kupata mamilioni ili kuokoa pesa na kuweka akiba kwa ajili ya siku zijazo. Kanuni rahisi ya utajiri ni kuokoa kiasi kikubwa cha pesa iwezekanavyo unapokuwa umepata pesa zaidi kuliko unazohitaji kuishi.
“Jambo la msingi kabisa la Kutengeneza utajiri ni kuweka ulinzi, na ulinzi huu unapaswa kuwa umejikita kwenye bajeti na mipango.” – Thomas J. Stanley
Mkakati muhimu ambao mamilionea hutumia kwa uangalifu ni kuendeleza mazingira ya kuishi maisha ya kawaida. Ingawa wanaweza kumudu chakula cha dola 200, wanachagua mlo wa dola 50. Badala ya kutumia gari la gharama kubwa, huchagua usafiri wa gharama ndogo ili kuokoa pesa.
2: Mamilionea Wanatenga Muda na Nguvu Katika Kutengeneza Utajiri Subira, shauku, na uvumilivu ni thamani muhimu miongoni mwa watu waliojilimbikizia utajiri. Stanley na Danko waligundua kwamba mamilionea huwa wanawekeza muda na nguvu katika kupanga mustakabali wao wa kifedha. Wanazingatia kujenga uchumi wao wa kifedha kuliko vitu vingine maishani. Mara nyingi kutengeneza utajiri huchukua miaka, ikiwa sio miongo.
“Kipato ni kile unachobeba kupeleka nyumbani leo. Utajiri ni kile unachokuwa nacho kesho, kesho kutwa na siku inayofuata” – Thomas J. Stanley
Kinyume na imani inayoenezwa na vyombo vya habari, kujenga utajiri sio tukio la haraka au la mara moja. Badala yake, ni la polepole, la mfumo na linalochukua muda kukomaa.
Kuwa na kipato cha juu sio sababu ya moja kwa moja ya kutengeneza utajiri kwa haraka. Wapokeaji wa kipato cha juu mara nyingi wanagawanywa katika makundi mawili ambayo ni Walimbikizaji wa utajiri (Prodigious Accumulators of Wealth (PAW)) na walimbikizaji duni wa utajiri (Under Accumulators of Wealth (UAW))
Walimbikizaji wa Utajiri (PAWs) ni mabingwa wa kuokoa pesa na kukuza utajiri. Wana thamani ya utajiri mara nne zaidi ya watu wengi wenye kipato kama chao. Wanazingatia katika kufikia uhuru wa kifedha. Walimbikizaji Duni wa Utajiri (UAWs) wanafanya chini ya wastani katika kuokoa pesa. Hivyo, wako nyuma sana ya PAWs licha ya kuwa na kipato kama chao.
Bahati mbaya, UAWs wengi ni wataalamu wenye elimu ya juu wanaopata kipato cha juu. Hata hivyo, wanatumia pesa zao kudumisha maisha ya anasa. Pia wanajaribu kudumisha viwango vya maisha ya juu ili kujionyesha kwa jamii inayowazunguka.
“Ni vipi watu wenye elimu nzuri, wenye kipato cha juu wanaweza kuwa wajinga kiasi hicho kuhusu pesa? Kwa sababu kuwa na elimu nzuri, kupata kipato cha juu haimaanishi moja kwa moja kuwa na uhuru wa kifedha. Kutengeneza utajiri na kuwa na uhuru wa kifedha Inahitaji kupanga na kujinyima.” – Thomas J. Stanley
3: Mamilionea Wanapima Uhuru wa Kifedha Kuliko Hali ya Kijamii ya Anasa. Tunaishi katika ulimwengu wa mitandao ya kijamii ambapo watu mara nyingi wana hamu ya kuonyesha maisha ya kifahari kwa ajili ya umaarufu. Ikiwa jambo hili ni udhaifu ulio nao, hauko peke yako. Kwa bahati mbaya, kuzuia hamu hii inaweza kuwa ngumu. Ili kuonekana tajiri katika ulimwengu wa nje, vijana wengi hujitahidi kutumia pesa nyingi kuliko uwezo wao ili kujionyesha mitandaoni.
Ni mikopo ndiyo inayoendesha maisha ya anasa ya wafu wengi leo, sio mapato halisi. Watu wanataka kuwa na nguo za wabunifu maarufu na kukodisha magari ya starehe. Hata hivyo, nguvu zao za kifedha haziruhusu hilo. Kwa kufuata maisha haya ya anasa, huwezi kuwa na amani inayotokana na uhuru wa kifedha. Badala yake, kwa ndani kabisa, mbali na macho ya umma, utakuwa unajua kuwa haujafanikiwa kifedha.
“Kuna uhusiano wa kinyume kati ya muda uliotumika kununua vitu vya anasa kama magari na nguo na muda uliotumika kupanga mustakabali wa kifedha wa mtu.” – Thomas J. Stanley
Mamilionea bora wa Marekani hawahisi kuwa na shinikizo la kuthibitisha kwamba wanaishi maisha ya anasa kwa ulimwengu. Badala yake, wanapendelea kupata uhuru wa kifedha kuliko kuonekana matajiri. Wanaona uendelevu wa kifedha kama tuzo kuu ya kukua na kutengeneza utajiri.
“Ili kujenga na kudumisha utajiri, itakuwa muhimu kwako kushughulikia usimamizi wote wa kifedha – matumizi, kuweka akiba, kuzalisha mapato, kuwekeza – kwa njia tofauti, kwa nidhamu zaidi kuliko mtu yeyote mwingine anayekuzunguka” – Thomas J. Stanley
Kitabu cha The Millionaire Next Door kinaonyesha kwamba uhuru wa kifedha unachangia ustawi. Mamilionea wana furaha na kujiamini zaidi katika uendelevu wao wa kifedha wa sasa na wa baadaye. Wana malengo na madhumuni wazi ya muda mfupi na mrefu, yakiwaruhusu kupanga na kubajeti mahitaji yao kulingana na vipaumbele.
Kila mtu anathamini ustawi wa familia zao kuliko vitu vingine. Zingatia uhuru wa kifedha na epuka dhana ya mitandao ya kijamii ya “tajiri.” Kwa njia hii, unaweza kufurahia uhuru wa kifedha na familia yako kama milionea bora.
4: Mamilionea Hawaendekezi Maisha Ya Kujionyesha. Vijana wa kiume na wa kike wenye wazazi matajiri mara nyingi hufanya sherehe za anasa na kuonyesha maisha yao ya gharama kubwa. Hata hivyo, hilo sio zuri kwa mustakabali wa kifedha wa vijana wenyewe. Kwa kweli, hilo linaweza kuwa janga la kifedha linaloandaliwa.
Wazazi wengi matajiri hutumia pesa nyingi kwa watoto wao kupitia zawadi za pesa taslimu na kufadhili safari zisizo za biashara.
Kuishi maisha ya uangalifu katika maisha yako kunafundisha watoto wako kufuata mtindo huo wa maisha. Kuwa na matumizi makubwa kunahimiza watoto wako kukumbatia maisha ya anasa badala ya kutengeneza utajiri. Kufundisha watoto wako umuhimu wa uangalifu katika matumizi ya fedha ni ufunguo wa utajiri. Inawasaidia kuendeleza mipango ya kufikia uhuru wa kifedha.
5: Mamilionea Wanalea Watoto Wenye Majukumu ya Kiuchumi. Hakuna mtu anayetaka kuacha urithi mbaya anapofariki. Kila mtu anataka urithi wake udumishwe kwa miongo na vizazi vyake viongeze utajiri. Lakini je, hili linatokea kila wakati?
Watoto wanaotegemea wazazi watarithi utajiri zaidi kutoka kwa wazazi wao. Lakini mara nyingi wanakosa maarifa ya kuwekeza na kujilimbikizia utajiri. Hii inawapelekea kutumia vibaya utajiri kupitia maisha ya kifahari. Hata hivyo, mahojiano ya Stanley yanaonyesha jinsi mamilionea bora wanavyochukulia malezi ya watoto wanaojitegemea. Hapa kuna baadhi ya masomo ya kujifunza kutoka kwao:
Usiwaambie wako kwamba wewe ni tajiri. Watoto wenye wazazi wa UAW huiga tabia za matumizi ya wazazi wao. Pia wana hamu ya maisha ya anasa. Lakini watoto wa wazazi wa PAW hukua bila kujua thamani ya utajiri wa wazazi wao. Hii inawasaidia kujifunza kuwa kujitegemea na kuwajibika kwa tabia zao za matumizi ya fedha.
Wafundishe watoto wako kuwa waangalifu kwenye matumizi ya pesa. Bila kujali umekusanya utajiri kiasi gani, fanya uangalifu. Wafundishe watoto wako vivyo hivyo ili waweze kuishi maisha rahisi. Watoto wako hawapaswi kutambua kuwa wewe ni tajiri hadi watakapokuwa watu wazima wenye majukumu na nidhamu. Wakati wanatambua utajiri wako, wanapaswa kuwa wamekomaa vya kutosha kuchukua majukumu na kufanya maamuzi chanya ya kuongeza utajiri.
Elekeza watoto wako kuelekea mafanikio. Mamilionea wengi wanasisitiza haja ya kuwafundisha watoto wao jinsi ya kutengeneza utajiri. Kuwafundisha watoto kwamba kupata kipato kunawezesha matumizi zaidi kutaangamiza maisha yao ya kiuchumi. Bahati mbaya, hivyo ndivyo wazazi wengi wa UAW wanavyofanya. Matokeo yake, watoto wao wanapopata ongezeko la mshahara, wanazingatia kuongeza matumizi. Badala yake, wanapaswa kujifunza kuokoa au kuwekeza pesa wasizozihitaji.
6: Mamilionea Wanatumia Fursa za Soko. Mamilionea wanafanyaje maamuzi ya nini cha kutumia? Wapangaji wa kimkakati wanafahamu siri za pesa. Wanawekeza katika huduma za afya za familia zao na biashara zinazoongeza uzalishaji.
Mamilionea wanafanya uangalifu kwa kuepuka bidhaa na huduma zisizo za lazima. Hata hivyo, hawana uoga wa kuchukua hatari zilizohesabiwa kwa fursa za biashara zenye thamani.
“Moja ya sababu ambazo mamilionea wanafanikiwa kiuchumi ni kwamba wanafikiri tofauti.” – Thomas J. Stanley
Ili kufuata nyayo za mamilionea, jifunze kupanga uwekezaji wako kwa uangalifu. Fursa zenye hatari kubwa zinaweza kuwa na malipo makubwa ikiwa zitachunguzwa na kutekelezwa kwa uangalifu.
7: Mamilionea Huchagua Kazi kwa Hekima. Una mpango gani wa kutengeneza utajiri? Je, unataka kufikia kilele cha kazi yako au kuanzisha biashara yako mwenyewe kutoka mwanzo?
Kitu cha kushangaza ni kuwa, mamilionea wengi nchini Marekani ni wamiliki wa biashara binafsi. Unaweza kupata mshahara mkubwa kutoka kwenye ajira yako. Hata hivyo, utajikuta unatumia sehemu kubwa ya mshahara wako kulipia bili zako na kudumisha maisha yako ya gharama kubwa.
Kinyume chake, wamiliki wa biashara hupokea kipato kutoka vyanzo tofautitofauti. Njia hizi zinawawezesha kuzidisha uwekezaji wao huku wakiendeleza maisha rahisi.
“Utajiri ni kile unachojilimbikizia, sio kile unachotumia” – Thomas J. Stanley
Kuanzisha biashara sio dhamana ya kuwa milionea. Biashara nyingi hazitimizi malengo ya wamiliki. Kushindwa kwa biashara nyingi kunaweza kuwa ni kutokana na ushindani au mipango mibovu.
Mamilionea wanazingatia kuchagua kazi za kuwekeza. Wawekezaji wengi wa kawaida hudhani kazi maarufu ndizo zenye mafanikio zaidi. Hata hivyo, mamilionea wana maoni tofauti. Hapa kuna baadhi ya mawazo kuhusu kuchagua kazi sahihi:
Sekta Isiyovutia. Si ajabu kwamba mamilionea wengi wanawekeza katika biashara hizi zinazoonekana ‘zisizovutia’. Sekta zisizovutia ni thabiti zaidi lakini hazivutii watu wengi.
Uangalifu katika Biashara. Unahitaji kufanya uangalifu katika maisha yako binafsi na katika biashara. Punguza matumizi katika idara zisizo na tija. Hii itakusaidia kuzidisha rasilimali katika maeneo yanayotoa faida zaidi.
Maarifa Mapana ya Biashara. Usiwekeze katika biashara tu kwa sababu inaahidi kuwa na faida. Mamilionea wengi wana ujuzi katika maeneo ya biashara wanayowekeza. Ikiwa haujazoea sekta ya ukarimu, fikiria upya kabla ya kufungua mgahawa.
8: Mamilionea Wana Malengo na Madhumuni Wazi. Kama vile binadamu walivyo na sifa za kipekee, vivyo hivyo katika kujenga utajiri. Umepanga kukusanya utajiri kiasi gani katika mwaka mmoja? Ni mikakati gani umeweka ili kuhakikisha unafikia lengo lako?
Mamilionea wengi ni wapangaji wakuu na wenye ufanisi katika kufafanua malengo yao. Wanatoa kipaumbele katika usimamizi wa fedha zao. Wengi wana ratiba za kila siku, kila wiki, na kila mwezi kufuatilia maendeleo yao.
Malengo yanatoa taarifa kuhusu mikakati na njia wanazochukua. Wanachanganua malengo ya muda mrefu katika majukumu madogo yanayoweza kusimamiwa. Hii inatoa njia wazi kuelekea lengo la mwisho.
Katika kitabu chake, No Excuses! Brian Tracy anadai kwamba asilimia tatu tu ya Wamarekani wazima wana malengo na madhumuni. Kundi hili linajilimbikizia utajiri mkubwa zaidi kuliko sehemu nyingine ya idadi ya watu.
Ikiwa uko tayari kufanya kile kinachohitajika kuwa milionea, anza kwa kuweka malengo na madhumuni. Changanua malengo yako kwa kuyagawa katika malengo madogomadogo na kuanzisha mipango kwa kila hatua itakayokupa mtazamo wazi wa malengo yako.
9: Mamilionea Wamepitia Nyakati Ngumu. Wengi wetu tunazingatia tu hadithi za mafanikio ya mamilionea. Lakini hatuelewi historia ya mafanikio yao. Mamilionea wengi walivuka mipaka yao kufikia walichonacho. Je, umewahi kufikiria kufanya kazi mbili bila likizo? Haya ni baadhi ya mambo ambayo mamilionea wamevumilia katika safari yao.
Safari za kujenga utajiri mara chache huwa rahisi na zinahitaji maadili makali ya kazi. Mamilionea wengi waliojijenga wenyewe wamelazimika kukabiliana na vikwazo na vizuizi ili kufikia kiwango chao cha mafanikio. Pia wamelazimika kujinyima katika sasa yao ili wawe katika nafasi nzuri kwa siku zijazo.
Fikiria gari la michezo unalotaka kununua leo ambalo linagharimu $50,000. Hata kama una pesa taslimu za kununua, hiyo $50,000 je, huwezi kuwekeza katika masoko ili kupata faida kubwa zaidi? Mamilionea wangeona hiyo ni fursa inayostahili kuchangamkiwa ili kupata faida kubwa zaidi baadaye.
Kila hadithi inaleta mtazamo kwamba hakuna njia rahisi ya kujilimbikizia utajiri. Inahitaji kujitoa, uvumilivu, na nidhamu.
Muhtasari wa Mwisho na Mapitio ya Kitabu cha The Millionaire Next Door. Kitabu cha Stanley na Danko, The Millionaire Next Door, kinawasilisha njia ya kweli ya kuwa milionea bora. Huna haja ya kuthibitisha wewe mwenyewe au utajiri wako kwa watu. Kutumia pesa zako kwa vito vya thamani, nguo za wabunifu, na magari hupunguza utajiri wako.
The Millionaire Next Door inaonyesha kwamba, kuwa milionea inamaanisha kuokoa mapato yako ya ziada. Zaidi ya hayo, kupata utajiri sio otomatiki unapokuwa na pesa zaidi kuliko unazohitaji. Badala yake, ni mchakato wa polepole ambao unaweza kuchukua miaka. Safari pia inaweza kujumuisha changamoto nyingi. Uvumilivu wako na utayari wa kufanya makosa na kuyarekebisha ni muhimu.
Nimatumaini yangu kuwa umepata maarifa ya kukusaidia kutengeneza utajiri kutoka kwenye kitabu hiki cha The Millionaire Next Door. Kama una maoni basi usisite kuandika hapa chini. Pia unaweza kuwasiliana nami kwa simu namba 0752 081669. Asante sana na karibu katika makala zinazokuja.
