Linapokuja suala la kufikia malengo yako binafsi na ya biashara, pesa huwa ni kitu muhimu sana katika kupima mafanikio yako. Hivyo, kuwa na mtazamo chanya kuhusu pesa ni muhimu sana katika kufikia mafanikio na ustawi wako kwa jumla. Ili kujenga mtazamo chanya kuhusu pesa, unatakiwa kuondoa imani zote na mawazo hasi yote yanayokuzuia kuchukua hatua za kuchangamkia fursa zinazojitokeza, kisha kuanza kuutazama ulimwengu kwa mtazamo wa kuona fursa zilizomo. Watu wengi wameshindwa kufanikiwa katika maisha yao sio kwamba hawana uwezo au hawana fursa za kuwafanya waweze kufanikiwa, bali wana mawazo hasi kuhusiana na wao wenyewe. Mawazo ambayo yamewafanya washindwe kujiamini kuchangamkia fursa zinazojitokeza katika maisha yao. Fursa ambazo zingewapatia mafanikio makubwa ya kifedha. Ikiwa unataka kujenga mtazamo chanya kuhusu pesa na hivyo kufanikiwa katika maisha yako, kuna hatua chache ambazo unapaswa kuzichukua. Katika makala ya leo nitakushirikisha hatua nne za kujenga mtazamo chanya kuhusu fedha Ili uweze kufanikiwa kwenye maisha yako.
Mtazamo Chanya Kuhusu fedha ni Nini?
Mtazamo chanya kuhusu fedha ni jinsi mtu anavyoona na kuchukulia suala la fedha kwa njia nzuri na yenye matumaini. Ni mtazamo unaohusisha kuamini kuwa fedha ni chombo cha kuboresha maisha na kufikia malengo ya kimaisha. Kwa ujumla, mtazamo chanya kuhusu fedha ni muhimu katika kujenga ustawi wa kifedha na kufikia malengo yako ya kimaisha. Ni njia ya kuona fedha kama chombo cha kuboresha maisha yako na kufikia mafanikio.
Mtazamo kuhusu pesa ni mtazamo ambao unaathiri maamuzi yako ya kifedha ya kila siku. Maamuzi yako ya kila siku kuhusiana na fedha zako yana athari kubwa sana kwenye mafanikio yako. Ikiwa utabadilisha mtazamo wako kuhusu fedha, utaweza kufikia mafanikio makubwa sana kwenye maisha yako.
Hatua nne za kujenga mtazamo chanya kuhusu fedha Ili uweze kufanikiwa kwenye maisha yako.
1.Jisamehe Makosa Yako ya Kifedha Uliyowahi Kuyafanya.
Kama kuna makosa ambayo umewahi kuyafanya ambayo yamekufanya uwe hapo ulipo, jambo la kwanza kabisa unapaswa kujisamehe. Lengo ni kubadilisha fikra zako na kuweka mtazamo mpya ambao ni chanya kuhusu pesa kwa siku zijazo. Ili kujisamehe makosa yako ya kifedha, kwanza tambua kilichotokea, jifanyie msamaha, kisha lenga kusonga mbele.
2.Weka Malengo ya Kifedha.
Baada ya kujisamehe makosa yako ya kifedha ya zamani, hatua inayofuata ni kuweka malengo ya kifedha. Unapoweka malengo, tambua vitu muhimu zaidi kwako, na uviweke kwenye orodha.
Utatakiwa kutambua ni malengo gani yanaweza kufikiwa kwa muda mfupi, muda wa kati na muda mrefu.
3.Boresha Bajeti Yako.
Kuwa na mafanikio kifedha sio kitu rahisi. Ili uweze kuwa na mafanikio kifedha, unapaswa kuwa na bajeti. Katika kuandaa bajeti, kanuni nzuri ni kanuni ya 50/30/20. Katika kanuni hii, 50% ya mapato yako yanapaswa kwenda kwenye mahitaji yako ya msingi kama vile malazi, chakula, mafuta, na dawa, 30% kwa matumizi ambayo siyo ya msingi na 20% inapaswa kuwekwa akiba. Ikiwa una deni, hiyo 20% unaweza kuitumia kulipia deni. Kumbuka kuwa, Ili uweze kuwa na mafanikio ya kifedha, hakikisha unatenga 20% ya akiba kabla ya matumizi mengine. Pesa hii unaweza kuiwekeza ili izalishe.
4.Jifunze elimu kuhusiana na mafanikio ya kifedha.
Jambo jingine la muhimu kama unataka kujenga mtizamo chanya kuhusu fedha, pata elimu ya fedha kwa kusoma vitabu vinavyohusiana na mambo ya fedha na kujifunza kutoka kwa watu waliofanikiwa.
Baada ya kujua jinsi ya kujenga “mtazamo chanya kuhusu pesa,” anza kutekeleza vidokezo hivi kwa ajili ya mafanikio yako ya baadaye.
Ni matumaini yangu umepata maarifa ya kukusaidia kujenga mtazamo chanya kuhusu fedha ili uweze kufanikiwa. Kama una swali au maoni yoyote usisite kuandika hapa chini. Pia unaweza kuwasiliana nami kwa simu namba 0752 081669. Asante na karibu kwenye makala zinazofuata.
